SA CIUDAD NIN NAGA: DPWH nagtagama na nin P235-M sa bypass road

Igwa nang fondo an Department of Public Works and Highways (DPWH) nganing dagos-dagos an implementasyon kan Almeda-Mabolo Bypass Road na pigpuponan na an proyekto na cantidad P20 milyon sa road opening hale sa 2020 congressional fund ni Diputado Gabby Bordado kan tercer distrito kan Camarines Sur.

Ngunian na taon nag-abot na sa opisina rehiyonal kan DPWH Bicol an dugang na fondo na cantidad P235 milyon na iyo an ma-implementar kan pagpadagos kan road opening.

Ini an mga pahayag ni Assistant District Engr. Richard Emmanuel Ragragio kan Camarines Sur 3rd Engineering District sa Baras, Canaman, CamSur, alagad an saindang opisina rehiyonal iyo an mapasubasta kan proyekto mientras na sinda an mag-implementar.

An road right of way na aagihan kan Almeda-Mabolo Bypass Road hale sa donasyon na lote kan duwang familia na sinda Gene Jaucian asin Antonio Martinez na igwang total nin 9,872 metros cuadrado.

An gobierno lokal kan Ciudad nin Naga sa pamamayo ni Alcalde Nelson Legacion asin an landowners nagpirmahan na kan deeds of donation kan familia Jaucian asin Martinez sa ginibong ceremonya kan Oktubre 12, 2020 matapos kan flag raising ceremony sa City Hall.

Sa desinyo kan konstruksyon kan multimillion pesos na proyecto igwang apat na agihan asin bike lane.

Oras na matapos, an bypass road magkakaigwa digdi nin mahiwas na tinampo nganing makaresolber sa problema sa trafico sa kalabaan kan Roxas Boulevard (dating diversion road) asin Almeda Highway.

An tinampo makakatabang sa ambisyon kan City Hall para sa bago naman na central business district. (DPAureus)