SA CIUDAD NIN NAGA: Festividad ni Ina padagos na sinusongko nin mga devotos

Naghihibog na an pag-arabotan kan mga debotos asin mga turista sa Ciudad nin Naga sa tahaw kan sarong bulan na mga actividades kan kapiyestahan kan patrona nin Peñafrancia na nagrarani na sa paagi kan gigibohon na traslacion procession ngunian na Septiembre 12 nganing darahon an imahen ni Ina sa Naga Cathedral para sa siyam na aldaw na Misa de Novenario.

An tradisyonal na selebrasyon sinusongko si Ina huli kan saindang mga pagtubod asin debosyon mantang an iba iribahan an saindang familia na nagsusulo nin candila sa saindang pagkakasararo sa pagpamibi ki Ina asin Divino Rostro.

An local na gobierno kan Ciudad nin Naga asin Archdiocese of Caceres haloy nang nag-andam kan saindang mga actividades civico asin religious events mantang sa Septiembre 20 iyo na an fluvial procession sa pagbalik kan imahen sa saiyang estaran sa Peñafrancia Basilica Minore.

Kinakarkulo kan Naga City Police Office (NCPO) na maabot sa 950 mil na mga debotos asin turista an maruso ngunian na traslacion procession. An Joint Operation Center para sa Peñafrancia Festival 2025 haloy nang nakaandam kan saindang plano matapos kan mga ginibong coordinating meeting kaibahan an Naga City Police Office mantang yaon an man tropa kan 9th Infantry Division kan Philippine Army na mamantenir kan seguridad sa traslacion asin fluvial procession asin iba pang mga actividades civico kan ciudad.

An pag-arabotan kan ribo-ribong debotos haloy nang nahaman an security plan kan NCPO sa pamamayo ni Col. Gilbert Farinas para sa seguridad kan debotos asin mga turista.

Yaon na an labi sa dos mil na augmentation force kan Philippine National Police Regional Office 5 (PRO-5) asin yaon pa an tropa kan maabot sa on mil na soldados kan 9th ID kan Philippine Army na pinamamayohan ni BGen William Peñafiel Jr. Kabale sa saindang tototukan iyo an gigibohon na traslacion asin fluvial procession. Afuera pa kaini, madestino pa sinda sa mga simbahan asin sa iba pang matawong lugar.

Sinabi ni CD Farinas na nagpaluwas na sinda nin amay na traffic advisory sa publico nganing maaraman an lugar na mga pagbabago sa bulos nin trafico sa centro kan ciudad.

Sa City Hall, kabale sa saindang huring actividades iyo an civic asin military parade na gigibohon sa temporaryong entablado sa Plaza Quince Martires.

TRASLASCION PROCESION. Pagdara kan imahen ni Nuestra Senora de Peñafrancia sa Naga Cathedral para sa siyam na aldaw na Misa de Novenario.