SA CIUDAD NIN NAGA: Mga escuelahan pabalik na sa limited F2F classes

Nagdadakul nang mga escuelahan sa Ciudad nin Naga an nagsasabay sa expanded limited face-to-face (F2F) classes sa tahaw kan nasa Alert level 1 na an ciudad asin zero na sa caso sa Covid-19.

Nagpuon sa Panicuason Elementary School nadagdagan nin tolong escuelahan na kinababalehan kan Carolina National High sa barangay Carolina, nagsunod an Tinago National High School asin kan Lunes, Marso 28 nagsunod na an segundarya kan Naga College Foundation.


Si City School Division Superintendent Manny de Guzman kan Department of Education sa Ciudad nin Naga nagpahayag na nakapuon sinda sa expanded F2F classes sa segundarya mantang iyo muna an inaprubaran ni Alcalde Nelson Legacion alagad duwang semana na an nakakaagi inaprubaran na kan jefe ejecutivo na puedeng tugotan na an mga elementarya sa public asin private schools.


Ngunian na semana igwa naman tinawan nin permit siring kan Saint Michael High School para sa senior high school, sarong private school; Mariners Polytechnic Colleges para sa senior high school asin Naga View Adventist para sa estudiantes kan junior asin senior high school.


Dai palang nahahaloy nakasumiter naman sinda sa opisina rehiyonal kan DepEd kan labi sa sampolong high school asin elementary schools.


An expanded in person classes saindang piglimitaran sagcod sa 20 estudiantes cada classroom alagad dapat an mga escuelahan ipasunod an health protocols mantang dai pa nahahale an problema sa Covid-19 dawa zero case na an ciudad.


Kabale sa iimplementar na dapat igwang ‘‘parent/guardian consent’’ an arin man na estudiantes na malaog sa F2F classes.


Dinagdag pa ni de Guzman an iba pang pribado asin pampulicong escuelahan nag-aandam na sa in person classes alagad kaipuhan kumpletohon ngona ninda an gabos na guidelines kan opisina sentral kan DepEd.


An mga F2F graduation rites sa escuelahan pigtalaan sa Hulyo 2022. (dpa)