SA CIUDAD NIN NAGA: NTA mababa nin Php150-M sa ‘23

Dapat pag-andaman kan lokal na gobierno kan Ciudad nin Naga an pagbaba nin Php150 milyon kan marerecibing National Tax Allotment (NTA) sa sunod na taon 2023 envez an solusyon digdi maghigot paha an ciudad alagad mayong mangyayaring iimponer na dugang na buwis.

Si Consejal Salvador Del Castillo, sarong CPA-Lawyer asin dating executive director kan Bureau of Local Government Finance (2011-2015) nagpahayag kaini sa entrevista kan Bicol Mail kasunod kan epekto kan duwang taon na pandemya na apektado an koleksyon sa buwis sa lokal maging sa nasyonal kabale sa Bureau of Custom.

Kun ngunian igwang Php1.5 bilyon sa 2022 annual budget an City Hall kabale digdi an dugang na NTA maabot sa Php260 milyon alagad mababawasan nin Php150-M na maresulta sa paghuros kan annual budget sa 2023. Alagad piglalaoman na pasiring pa sana sa recovery period an gobierno sa 2024.

Huli kan pandemya nagparababa an koleksyon sa buwis sa nasyonal asin lokal maresulta man ini sa pagbaba kan marerecibing NTA, dating Internal Revenue Allotment (IRA) kan mga LGUs maging sa mga barangay.

Sinabi pa kan consejal an himolo kan LGUs sa national taxes base sa ika-tolong cuarto kan calendar year mantang an 2022 base sa 2019 na dai pa apektado kan pandemya nakadugang digdi an implementasyon kan Mandanas ruling na naglangkaw si NTA alagad paglaog kan 2023 huli ta pigbasehan kaini iyo an 2020 calendar, huli kaini seguradong mababa an kahirisan sa NTA resulta kan bagsak na koleksyon sa buwis.

Kabale sa dapat gibohon kan ciudad magtipid sa gastos tawan sana nin prioridad si mga importanteng mga proyekto siring kan edukasyon, social services mga importanting proyekto sa infrastraktura maging magtipid sa gastos sa petrolyo na padagos naglalangkaw an presyo.

Iginigilid kan City Hall an ano man na pag-imponer nin buwis huli ta apektado pa an mga negosyante mantang nagbabangon pa sana huli kan pandemya.

Bako lang mga negosyante maging an LGU nagbaba man si koleksyon sa Naga City People’s Mall saka sa Bicol Central Station. Huli kaini, imposible an pagbawi sa paagi nin paglangkaw nin buwis, sabi pa ni Del Castillo. (DPAureus)