SA CIUDAD NIN NAGA: P1.5-B annual budget sa 2023 papalusoton sa SP

Dai na makakaantos an huring semana kan Deciembre 2022 ma-aaprubaran kan Sangguniang Panlungsod kan Ciudad nin Naga an propuestong Php1.511,570,780.00 bilyon na 2023 annual budget, mas hababa nin Php133,819,493,64 milyon kumpara sa 2022 annual budget.

Alagad pakatapos kan mga budget hearings poon ngunian na semana kan Committee on Finance and Appropriation piglalaoman na maaprubaran antes kan Deciembre 20, 2022.

An kumposisyon kan consejo lokal iyo man giraray ‘‘ubos-kun-ubos, gabos kun gabos’’. Huli kaini, nagtutubod an komite na dai na sinda madidificilan nganing ma-aprubaran dawa na igwang mga maiinit na discusyon.

Ini an mga pahayag sa Bicol Mail ni Consejal Jess Albeus, pamayo kan komite mantang nagkaigwa na sinda nin enot na mga public hearings alagad an komite mag-papadagos kan budget hearing sa Miercules.

Ginigibong committee hearing sa propuestong 2023 annual budget kan Ciudad nin Naga pinapangenotan kan Chairman Consejal Jessie Albeus, asin Co-charirman Consejal Lito del Rosario, kaibanan an mga miembros Consejal Oying Rosales, asin Consejal Gayle Abonal Gomez, asin representante kan Liga ng Barangay PB Doris Dianne Lee. (CEPPIO)

Si 2022 annual budget na Php1,645,390,273.64 bilyon envez na maglangkaw sa sunod na taon alagad nagbaba nin Php133.8-M o nagbaba nin otso por ciento alagad sinabi ni Albeus bako lang an Ciudad nin Naga apektado envez an gabos na mga lokal na gobierno.

An dahilan iyo an duwang taon na hababang koleksyon sa buwis kan gobierno nasyonal asin lokal sa tahaw kan krisis sa pandemya.

Naglangkaw si National Tax Allotment kan ciudad ngunian na taon huli kan Mandanas-Garcia ruling na dai marerealisar kan LGUs sa saindang mga 2023 annual budget.

An solusyon kan City Hall sa paghuros kan annual budget iyo an paghigot paha sa tahaw kan pagparalangkaw pa kan tarifa sa kuryente kan Casureco II asin sa produkto nin petrolyo maging sa operational expenses kan cada departmento.

An saro sa lakdang ni Alcalde Nelson Legacion iyo an paghanap nin ayuda sa mga ahencia nasyonal nganing ipadagos an iba pang mga proyekto. (dpa)