SA CIUDAD NIN NAGA: Pambansang Pabahay ni PBBM nagtuturog pa
Maduwang taon na sa Marso 16, 2025 matapos pangenotan ni Presidente Ferdinand Marcos Jr. an ground breaking ceremony sa (4PH) program para sa anom na escalon na condominiums sa Ciudad nin Naga alagad sagcod sa ngunian dai pa nagpopoon an proyekto.
An dahilan iyo an problema sa dapat na isumetir na mga dokumento kan mga developer asin posibleng dai kursonada an lugar kan daga sa Balatas New Development Area (BNDA) na tutukdokan kan proyekto mantang an ibang developer asin si ibang interesado sagcod sana sa limang eskalon an saindang kayang ipatindog.
Ini an paliwanag sa entrevista kan Bicol Mail ni Eric Salvino, Shelter Officer kan Housing Settlements and Development Office sa City Hall alagad nagtutubod siya na igua man giraray makakasumiter kan saindang proposal sa proyekto nganing isumiter na sa Sangguniang Panlungsod. Halaba na an liog kan mga aplicante kahahalat kun nuarin masikad an konstruksyon kan proyekto.
Ini saro sa mga mayor na programa sa ‘‘Pambansang Pabahay Para sa Pilipino’’ (4PH) program ni Presidente BBM sa Ciudad nin Naga na kabale sa nangenotan iyo sinda Alcalde Nelson Legacion, asin Bise Alcalde Cecilia De Asis.
An HSDO naghahace na magkaigua nin housing summit, nganing tukaron an isyu para madagos na an implementasyon sa housing program kan administrasyon Marcos.
An lugar kan BNDA yaon na digdi an Naga City General Hospital, duwang edificio kan 4-classroom building, Center for Safety and Resiliency asin namumugtak na digdi an headquarters kan Bureau of Fire Protection kan Naga.
Igua man kaparejong programa sa Goa, Camarines Sur na piglalaoman masikad na an konstruksyon kan Condo sa dai mahahaloy na panahon.
An nasyon nakaatubang sa krisis huli ta milyones kan mga Filipino nag-eestar sa mga substandard na harong o mga informal settlements, sagcod na padagos na naglalangkaw an housing backlog.
Huli kaini, sa paagi kan 4PH program ni Presidente Marcos saiyang tinatawan nin prayoridad an programa sa pagpaharong.
An programa piglansar kan Septiembre 2022 na naglalaoman an administrasyon mangyayari na an ‘‘zero informal settlers'' sa 2028.
Comments