SA CIUDAD NIN NAGA: Pitong COC na macandidato sa SK binasura kan Comelec

Mayo nang nagprotesta alagad naging antimano an aksyon kan Commission on Election (Comelec) sa Ciudad nin Naga nganing ibasura an pitong nag-aambisyon na jovenes na maging opisyal kan Sangguniang Kabataan (SK) na nagsangat nin certifico de candidatura (COC) para sa eleksyon sa Oktubre 30.

Ini an kinumfirmar sa Bicol Mail ni Abogado Maico Julia Jr., election officer kan ciudad matapos magprubar na magsangat kan saindang COC na nagtapos kan Septiembre 2, 2023.

An pito kinababalihan kan limang sobra na sa edad na dapat 17 hasta 24 anyos, sarong kulang pa sa edad asin sarong dai rehistradong votante kan ciudad.

An desisyon kan Comelec naging awtomatico matapos kan saindang pagserne sa pig-file up na COC na dai man nakareclamo.

Dai makalusot sa saindang opisina an arin man na maprubar na magdaya sa saindang sadiri, sabi pa.

Sa nagtapos na filing kan COC poon kan Agosto 28 hasta Septiembre 2 igwang 1,069 total na nagsangat kan saindang candidatura para sa Barangay asin Sangguniang Kabataan Elections (BSKE). An ciudad igwang 120,685 total na rehistradong votantes. Sa mga candidatong punong barangay – 66, barangay kagawad – 607, sa SK chairman – 68, asin sa SK kagawad – 428.

Sa Camarines Sur na igwang 1,063 mga barangay igwang 1.3 milyon na rehistradong votantes.

Nagpatanid an Comelec na prohibido pa an pagcampanya poon kan Septiembre 3 hasta Oktubre 18 alagad an campaign period masikad sa Oktubre 19 hasta Oktubre 28.

An masinutil asin makampanya nin amay puedeng madiscalificar kan saindang candidatura. (dpa)