top of page

SA CIUDAD NIN NAGA: Robredo, tinatangkuros na masunod na alcalde

Siring sa piglalaoman nagboses na an Nagueño sa sarong survey na si dating Bise Presidente Maria Leonor G. Robredo iyo an tinatangkuros sa Ciudad nin Naga na magin alcalde sa eleksyon sa Mayo 2025.


Sa survey na pigkundusir kan Ateneo Social Science Research Center sa mga barangay kan ciudad sa 1,280 respondents si Robredo iyo an nangenotan na nakakua nin 47.7 por ciento nagsunod si Alcalde Nelson Legacion nakakua sana nin 27.3 por ciento nagsunod sinda Fortunato ‘'Tato’’ Mendoza – 8.4 por ciento; Representante Gabriel H. Bordado Jr. kan tercer distrito kan Camarines Sur - 2.9 por ciento; asin Noel De Luna – 1.9 por ciento.


An dating VP agom niya si DILG Secretary Jesse Robredo mawot ipadagos an legacia sa ‘'good governance’’ mientras mawot kan Nagueño na magiging angat sinda sa liderato kan gobiernong tapat.


Dawa dai pa nagkukumfirmar si Robredo na madalagan sa cargong alcalde alagad nasisilag na an saiyang plano asin hiro mala ngani rehistrado nang botante kan Barangay Concepcion Pequeña hale sa dating voting precinct sa Barangay Carangcang, Magarao, Camarines Sur.


Si Legacion na enot nang nagsabi na ma re-election alagad sa pinakahuring pahayag sa media planong magdalagan sa cargong congresista sa tercer distrito kan Camarines Sur.


Sa lado ni Bordado, haloy nang nagpahayag na mayong ambisyon na maghuros sa puestong alcalde sa masunod na eleksyon mantang ultimo nang termino bilang congresista asin mapahingalo na sa politica.


Si Mendoza, nagsabi na kun macandidato si Robredo sa cargong alcalde madalagan siya bilang bise alcalde asin si De Luna dai pa maaraman kun mabuelta sa laban politica sa Naga o tercer distrito kan provincia.


An research center kan Ateneo pigtitiwalaan na kan publico huli ta si mga enot na survey kun may eleksyon iyo man an naluwas sa resulta sa eleksyon.

ANGAT BUHAY DORM. Pinangenotan ni Atty. Leni Robredo, Principal Sulpicio Alferez III asin iba pa kan Sabado, Hunyo 15, 2024 an ground breaking ceremony kan itutukdok na female dormitory sa laog kan laguerta kan Camarines Sur National High School sa Ciudad nin Naga. Saro naman na proyecto kan Angat Buhay asin mga ka-partners ngunian na taon, nganing maestaran kan mga estudiantes na hale pa sa ibang lugar. (Atty. LRobredo FB)

Comments


bottom of page