SA CIUDAD NIN NAGA: Treceng candidato pinapaliwanag kan Comelec huli sa premature campaigning

Masikad na an karampanyahan sa Barangay, Sangguniang Kabataan Elections sa Oktubre 19 alagad treceng mga candidato sa BSKE sa Ciudad nin Naga an nakabali sa listahan na isyuhan nin show cause orders kan Commission on Election huli sa ‘‘premature campaigning’’.

Si Abogado Maico Julia Jr. Election Officer sa ciudad nagpahayag sa Bicol Mail an mga envueltong candidato pigreclamo huli sa pag post sa facebook kan saindang candidatura; igwang actividades na may kaiba nin pa-premyo, amay sa pagluwas kan saindang political jingle asin iba pa. Dai naman pinaluwas an saindang mga pangaran asin kun pera sa SK asin Barangay an nag-aatubang reclamo sa commission.

Igwang candidato matapos mag-file nin certifico de candidatura pig-post sa social media.

Nagpatanid man an Comelec na dapat simbagon sa pigtalaan na aldaw asin kun masinutil na baliwalaon sana an reclamo maatubang nin disqualification asin caso kriminal o election offense.

Kun caso kriminal asin maprubaran puedeng mag-estar sa carcel poon sa sarong taon asin anom sagcod na mayong probation.

An mga reclamo contra sa mga candidato sinangat na sa Comelec Central Office sa Manila.

Sa resolusyon kan komisyon an campaign period dapat magpoon sa Oktubre 19 hasta sa Oktubre 28 mantang an eleksyon sa Oktubre 30, 2023.

Sa ngunian digdi sa Bicol igwa nang 63 nag-aatubang nin reclamo kabali na an trece gikan sa Ciudad nin Naga.