SA COMELEC: "Kontra Bigay" hagad an kooperasyon kan publico

An kooperasyon kan publico dakulang bagay nganing maging epektibo an misyon kan Commission on Election sa ‘‘Kontra Bigay’’ sa tahaw kan nagrarani na an midterm elections sa Mayo 12, 2025.

Andam an Complaint Center kan Comelec sa paagi nin online bukas nganing recibihon an mga reclamo sa ‘‘vote buying’’, An Pagbakal asin Pagpabakal nin Boto ilegal na dapat isombong tolos sa saindang ahencia, sabi ni Election Officer Maico Julia Jr. kan Ciudad nin Naga.

Igua sindang Law Department na preparado mag-tabang sa paagi nin imbestigasyon na kaipuhan an sworn statement kan nagrereclamo asin testigos.

An nangyayari sa ngunian mga huring-huding sana na iguang nangyayaring vote buying alagad dapat iosip sa Comelec nganing andam sindang magtabang, sabi pa ni Julia.

Kaipuhan an disciplina kan mga candidato na dai na magbakal boto maging kan mga botante dai maghagad nin cuarta o ano man na bagay kun mangyayari ini mapopondo na an sinambit na isyu.

Afuera pa kaini, an pagtios saro sa isyu kaya napipiritan magpabakal an botante.

Sinabi pa ni Julia sa ngunian katuwang ninda sa kampanya sa Kontra Bigay iyo an IBP Camarines Sur, KBP Camarines Sur Chapter, Parish Pastoral Council for Responsible Voting (PPCRV) magin iba pang organisasyon civico, civil society asin PNP.

Katuyohan kan Comelec nganing macierto an malinig, onesto an pirilian. An kampanyang ini sarong ‘’Whole-of-Nation approach’’ nganing maprotehiran an integridad kan resulta kan eleksyon.

Alagad igua nang nag-osip sa Comelec Central Office na an rehiyon Bicol kabale sa may nagkaperang candidato na naggagamit nin ‘‘state resources’’ nganing gamiton na ibakal boto.