SA DAET, CAMARINES NORTE: Okasyon sa Rizal Day pig-aandam na, pinakaenot na monumento papagayonon
Pinakaenot na monumento ni Dr. Jose Rizal makukua sa Daet, Camarines Norte digdi liwat gigibohon an okasyon sa Deciembre 30, 2022 sa pagkomemorar kan ika-126 martyrdom anniversary sa herwe nasyonal Dr. Jose Rizal.
An okasyon papangenotan ni Gobernador Ricarte Padilla asin iba pang mga opisyales lokal, PNP asin Philippine Army.
Pakatapos kan actividades sa dai mahahaloy na panahon poponan an rehabilitasyon sa rekomendasyon ni Provincial Tourism Operations Officer Bong Palma asin suportado kan administrasyon kan Capitolio Provincial sa pamamayo ni Padilla.
Katuyohan kan tourism officer nganing mas pakusogon an industriya nin turismo kan provincia.
An monumento ni Dr. Jose Rizal digdi pinatindog kan 1898, segun ki Palma saiya nang pigsumiter ki Gob. Padilla an plano sa pagpagayon kan pinakaenot na monumento ni Rizal asin pinaboran kan jefe ejecutivo kan provincia.
An proyekto pigseguro kun matapos sarong atraksyon sa mga turista maging domestic man o dayuhan.
An desinyo bubugtakan nin kudal sa palibot kaini asin iaagid sa panahon nin espanyol maging an estraktura asin sa parke na digdi makukua an pinakaenot na monumento kan herwe nasyonal. Kabali paman iyo an pagpakarhay kan marker kan mga herwe kan banwaan nin Daet na iyo an kabesira kan Camarines Norte.
Pinakaenot na monumento ni Dr. Jose Rizal pinatindog kan 1898 sa Daet, Camarines Norte. (CamNorte FB)