SA DepEd BICOL: 30 sa 3,800 na escuelahan ok sa face-to-face classes

Binaba sa treinta (30) o 0.79 por ciento sa mga escuelahan kan Department of Education (DepEd) sa Bicol hale sa dating pigrecomendar na 1,200 o 30 por ciento kan 3,800 na escuelas publica an tutugotan sa limitadong face-to-face classes na puponan an dry run sa Enero 11-12, 2021.

Sinabi ni Gilbert Sadsad, regional director kan DepEd Bicol na kadakle kan mga escuelahan yaon sa Masbate na hababa an caso sa coronavirus disease (Covid-19) asin igwa man bilang sana sa muro sa ciudades asin ibang municipalidad sa anom na provincia kan rehiyon.

Treinta sana an inaprobaran kan DepEd central office sa pagbuelta sa face-to-face classes sa elementarya asin K-12 schools.

Alagad saiyang piglinaw na limitado sana sa veinte (20) estudiantes asin duwang aldaw sana an klase cada semana mantang magpapadagos an blended learning system, na may kumbinasyong home modular asin online classes.

Antes tugotan an klase dapat igwang resolusyon an Sangguniang Bayan/Panlungsod na naghuhurot sa IATF na mapuon na sinda kan limitadong klase sa lugar na zero sa Covid o hababa an caso sa virus.

Katuyohan kaini nganing mawasan an problema kan mga estudiante sa problema sa internet connectivity asin nadidificilan sa modular learning.

An desisyon kan DepEd bilang sarong pilot program na iimplementar sa Enero 2021.

Hahagadon man giraray kan DepEd sa mga magurang kun tutugotan ninda an aki na maglaog na sa face-to-face classes.

Kabale sa saindang estrictong iimplementar iyo an health protocol na saro sa pigmamando kan central office asin IATF.

Sa Ciudad nin Naga, si City School Division Superintendent Manny de Guzman nagpahayag na saro sanang escuelahan an tutugotan asin an napili iyo an Teodoro Elementary School sa barangay Carolina. (dpa)