SA DEPED BICOL: Nagpanday nin mga estrictong polisiya sa ‘‘Anti-Bullying Act’’

NagpandaY na nin mga polisiya an Department of Education (DepEd) sa Bicol nganing estrictong ma-implementar an ‘‘Anti-Bullying Act – RA 10627 sa mga escuelahan sa rehiyon.

Sa ginibong miting kan mga school superintendent sa Bicol na pinaapod ni Regional Director Gilbert Sadsad, kabale sa mga dapat ma-implementar iyo an pagbugtak nin CCTV camera, ‘‘one gate policy’’ o dapat iguang suhay na entrance asin exit, pag-estricto sa mga ID, surprisang inspeksyon sa mga bag kan estudiantes, asin dinagdag pa an home school coordinator sa PTA, imantener an mga security guard sagcod na magkaigua na sinda nin metal detector asin hagadon an suporta kan barangay tanod.

An mga polisiyang ini kan ahencia nganing maibitaran an posibleng gibohon na krimen kan estudiantes sa tahaw kan nangyaring school shooting sa San Jose High School sa Ciudad nin Tacloban kan nakaaging semana.

Dawa dai pa napaapod nin miting an DepEd Bicol alagad an manlaen-laen na mga escuelahan sa Kabikolan tolos naging alerto nagkaigua nin kanya-kanyang mga estrictong lakdang sa ‘‘bullying’’ kasunod kan nangyari sa Ciudad nin Tacloban.

An ‘‘Anti-Bullying Act’’, an mga escuelahan dapat iguang mga polisiya nganing ipasunod alagad dai kaayon an pangungulog kan maestra sa pasaway na estudiante. An escuelahan iyo an dapat magtahaw sa biktima maging sa pigrereclamo mantang kasunod kaini igua sindang dapat na gibohon na positibong pag-diciplina.

Laen kaini, igua nang enot na ‘‘DepEd Child Protection Policy o mas midbid sa DepEd Order No. 40, serye kan 2012 na prohibido an ano man na corporal punishment o pangungulog dawa na ngani nagpapasaway an estudiantes. Kan nakaaging mga panahon mayo pa kaining polisiya madaling madisciplina an mga pasaway na estudiante alagad sa ngunian mas nagdakul an mga nagpapasaway apesar na igua nang ‘‘Anti-Bullying Act’’.