Sa DepEd Camarines Sur: 500K estudiantes para sa school year 2022-23

Preparado na an Department of Education (DepEd) sa Camarines Sur sa pagralaogan sa klase kan maabot sa quinientos mil (500,000) na estudiantes sa burokasan nin klase sa Agosto 22, 2022 para sa school year 2022-2023.


Alagad nagkaperang mga escuelahan nagkukulang nin mga paratukdo na iyo an hinahanapan nin solusyon kan ahencia.


Si Assistant Division Superintendent Sueno Luzada Jr. nagpahayag sa entrevista kan Bicol Mail na sainda nang pig-andaman an limited face-to-face classes poon sa Agosto 22, 2022 alagad an pagralaogan kan gabos na estudiantes pigtalaan kan DepEd sa Noviembre 2022 base sa direktiva ni Bise Presidente/Secretary Sarah Duterte.


An elementarya iyo an may halangkaw na nagpalista na nag-total sa 275,120, mantang sa junior school nag-abot na sa 144,680 asin sa senior high school – 59,810.


Na-andaman na kan DepEd CamSur an in person classes sa sunod na school year mantang sa presenting school year nakapoon na sinda maging sa mga graduation exercises saindang pigpadagos depende sa desisyon kan escuelahan asin sa Parent Teachers Association (PTA), na magradwar an saindang estudiantes.


Naiiba sana huli ta estrictong pig-iimplementar an social distancing asin pagsulot nin face mask.


An PTA asin paratukdo pabor na ibalik na an F2F classes nganing buelong matukdoan kan escuelahan sa klase an mga estudiantes envez kan modular learning.


Duwang taon na pinasunod kan DepEd an blended learning huli kan pandemya.


Nagpadagos sana an in person classes kasunod kan pagbaba kan provincia nin Camarines Sur sa alert level 1 classification.


Sa ngunian nagkaperang mga school building na naraot kan nakaaging calamidad nagpapadagos na an paghirahay nganing sa burokasan nin klase sa Agosto 22 malaog na sana sa mga classroom an estudiantes.


Hinale na sa Department of Public Works and Highways (DPWH) an paghirahay kan mga classroom envez yaon sa jurisdiksyon kan mga lokal na gobierno na nasa first asin 4th class municipality kabale na sa bagong konstruksyon kan school building huli sa Mandanas ruling mantang si 5th class municipality iyo na sana an sakop kan DPWH, sabi pa ni Luzada. (DPAureus)