SA DEPED CAMARINES SUR: Zero sa F2F, nagpatindog duwang radio base, sabi

Dai kabale an Departamento de Edukasyon (DepEd) sa Camarines Sur sa pilot face-to-face classes (F2F) alagad igwa sindang duwang sadiring estasyon nin radyo mantang mayong estudiantes sa online classes huli sa problema sa internet connectivity.


Alagad an saindang radio base limitado an apon kan signal sa saro sanang banwaan asin nakakaabot man sa ibang barangay.


An duwang improvised radio base na makukua sa FM band yaon sa Don Servillano Platoon High School sa banwaan kan Tinambac asin Milaor National High School sa banwaan nin Milaor.


Ini an pahayag ni Assistant Division Superintendent Sueño Luzada, matapos mahale sa listahan an sampolong mga escuelahan sa DepEd Camarines Sur na saindang pigrekomendar huli ta limitado an inaprubaran kan saindang opisina sentral para sa pilot physical classes.


Sinabi ni Luzada igwang total na 1,907 an escuelas publica sa Camarines Sur asin sampolo digdi yaon sa remote barangay kadakle hale sa premirong distrito na zero sa caso sa cororavirus disease (Covid-19).


Enot nang pig-andam kan DepED CamSur an pilot physical classes na gigibohon na sa Noviembre 15, 2021 mantang kaipuhan magsunod sa health protocol alagad mayo sindang magiginibo magsunod sa desisyon kan saindang opisina sentral.


Sa Division of City School sa Ciudad nin Naga an Teodora Moscoso Elementary School sa Barangay Carolina iyo an pig-andaman sa F2F alagad mayo nang kasegurohan.


An guidelines kan DepEd national pinahayag ni City School Division Supt. Manny De Guzman an barangay kun saen gigibohon an pilot public school dapat zero sa Covid case sa laog nin 28 diyas antes kan implementasyon sa pilot F2F alagad nagparalangkaw si caso sa Naga asin nagkaigwang record an sinambit na barangay.


An iba pang kondisyon nganing tugotan an escuelahan dapat mayong problema sa transporasyon.


Naglalaom an DepEd Naga mawawara na an caso sa barangay sa tahaw kan mga report na padagos nang nagbababa an caso sa Covid-19 sa ciudad alagad an final approval iyo an saindang opisina sentral. (DPAureus)