SA DEPED: Klase sususpendiron kun halangkaw an caso sa kalintura

‘‘Distance learning’’ pwedeng ipasunod kan escuelas publica kun saindang sinuspende an face to face classes huli kan paglangkaw nin casong trangkasa, sipon, lagnat asin abo kan mga estudiantes.

Ini an aksyon kan Department of Education sa Camarines Sur sa paagi ni Atty. Salvador Pelingon, opisyal na parataram kan ahencia. An nasabing mga helang naglalakop na sa iba pang provincia maging ciudad.

Digdi sa Camarines Sur an Bagacay Elementary School sa Tinambac, Camarines Sur nagsuspende nin face to face classes nganing ilikaw an pagparalangkaw kan caso sa mga kaakian.

Kinumfirmar kan escuelahan dakul an mga nagpositivo na igua nang 15 an tinamaan nin kalintura, 86 nag-aarabo asin nagkaperang igua na nin chickenpox maging apektado naman an ibang mga paratukdo.

An Municipal Health Office nagkunducta na nin disinfection asin iba pang mga health interventions.

Si Alcalde Edward Albert Prades naghahagad na mag-cooperar an publico mantang nagpapadagos lang an pag-monitor kan MHO.

An suspension sa klase saro sa naging solusyon kan magkaigua nin COVID-19 sagcod nag-implementar nin ‘‘blended learning’’

An DepEd nagpatanid sa iba pang escuelahan na dapat regular an saindang pag-monitor sa mga estudiantes nganing maaraman tolos an kamugtakan kan saindang salud.