SA DEPED NAGA: Manga laboratory, shop room ginibong temporaryo classrooms

An nagkapera sa mga laboratory asin shop room sa mga kulang na classrooms na mga escuelahan sa Ciudad nin Naga iyo ngona an okupado huli ta kulang an mga classroom na naraot kan nakaaging calamidad.

Si mga raot na classrooms pinapahirahay nganing pag-andaman an full face-to-face classes sa bulan nin Noviembre 2022.

Nagkapera sa mga school na kulang an classrooms iyo an Cararayan National High School, Science High School, Naga Central School 1 and 2, asin iba pa.

Alagad igwa nang ibang mga escuelahan na nagkakaigwa na nin full face-to-face classes an ibang mga escuelahan sa public schools kan ciudad.

Ini an mga pahayag ni Dr. Manny De Guzman, School Division Superintendent kan Department of Education (DepEd) sa ciudad kan makaulay kan Bicol Mail.

Sa ngunian nagkakaigwa na nin hibog kan trafico sa mga mayor na tinampo mantang dakul nang mga escuelahan sa ciudad an nagpopoon na kan saindang limited F2F classes nganing preparado na sinda sa pagsikad kan 100 percent in person classes sa Noviembre base sa directiva ni Vice President asin DepEd Secretary Sara Duterte.

Alagad sinabi pa kan DepEd Naga aram na ninda an mga dapat gibohon sa limited F2F huli ta dati na sindang nag-iimplementar kaini kan Marso kan nakaaging taon.

Sinabi pa ngunian na school year 2022-2023 maabot sa 53 mil an populasyon poon sa kindergarten, elementary asin high school mantang sa pribadong escuelahan pigpahayag na puedeng mag-abot sa 21 mil.

Kan nakaaging semana dawa nagsikad na an formal na erescuelahan alagad igwa pang mga magurang na nagpipirit ipalista an saindang estudiantes na tinutugotan man giraray kan DepEd kan ciudad.

An mga escuelahan nagseguro na saindang pinapasunod an health protocol. (dpa)