SA DESISYON KAN SC: Candidato sa barangay dai kaayon sa political dynasty

An Commission on Election (Comelec) naglinaw na an hagop sana kan political dynasty sa maabot na Barangay Sangguniang Kabataan Elections (BSKE) iyo an mga candidato sa Sangguniang Kabataan.

Ini base sa desisyon kan Corte Suprema sa caso na sinangat contra sa sarong candidato sa SK na nagbalga sa probisyon kan SK Reform Law’s ‘‘anti-dynasty’’ contra sa mga nagcacandidato na magsadiring tawo na malinaw na prohibido.

Si Atty. Maico Julia Jr. nagpahayag sa Bicol Mail sa tahaw kan mga kahapotan kan ibang mga macandidato sa BSKE sa Noviembre 2, 2026.

Cuestionable sa ibang sektor kun tano mga candidato sana sa SK iguang ley sa political dynasty alagad sa ibang mga candidato lokal asin nasyonal dai kaayon.

Sa binabang desisyon kan SC En Banc saindang binasura an petisyon na sinangat kan nag-ngangaran na Merson Caluag, na pigcuestion an resolusyon kan Comelec na nagdidiscalificar sa saiya komo SK chairperson candidate kan Barangay Magtangle, San Francisco, Surigao del Norte durante sa ginibong BSKE kan 2023.

An Comelec Second Division nadiscobre na si Calubag nagputik sa saiyang pig-file up pan na COC na nagdedeclara na mayo siyang relasyon o nasa laog kan civil degree of consanguinity sa arin man na Sangguniang Barangay na miembro kan Brgy Council kan Magtangle, apesar na miembro an saiyang ina.

Huli kaini, binasura an saiyang candidatura alagad nagsangat petisyon sa Corte Suprema.

An filling kan certificate of candidacy sa BSKE sa Septiembre 5 hasta Oktubre 5 mantang an campaign period pigtalaan sa Oktubre 22 hasta Oktubre 31 asin an aldaw kan eleksyon sa Noviembre 2, 2026.