SA DESISYON NI ROBREDO VS LAND CONVERSION: Pinaboran kan sektor nin paraoma

Paborable sa sektor nin paraoma an desisyon ni Alcalde Leni Robredo na dai na tutugotan an land conversion kan produktibong daga sa Ciudad nin Naga, kasunod kan ginigibo nang industrial apesar na omahan pa o pwede pang tanuman nin gulayon.

Si dating Consejal Julian ‘’Mang Julia’’ Lavadia Jr. nagsabi na an saindang organisasyon kan Naga City Coconut Farmers Cooperative, Bicol Learning Site for Agriculture, Uma Sarig Agri Coop asin Camarines Sur LSA Inc, pasalamat sa aksyon ni Robredo mantang nagkaperang mga omahan sa ciudad apesar na ‘’irrigated farm’’ alagad pinapaagi sa dai na ngona inuoma alagad nakakalusot sa Department of Agrarian Reform nganing aprubaran sa ‘’land conversion’’ apesar na dai pa nag-agi sa pagtugot kan City Agriculture asin Sangguniang Panlungsod. Piglimbawa digdi si nangyari sa mahiwas na omahan sa Barangay Pacol na-aprubaran sa land conversion kan DAR dawa dai nag-agi sa City Agriculture asin sa SP.

Sinabi pa ni Lavadia nagdidikit na an agricultural land sa ciudad asin napapanahon an aksyon kan jefe ejecutivo nganing makatabang sa halangkaw na produksyon sa agricultura kan ciudad.

Magin si City Agriculture Jap Asenso kan City Agriculture Office (CaGo) nagsabi na pabor sa sektor paraoma an desisyon ni Robredo na digdi maheheling an ‘‘political well’’ kan gobierno lokal nganing isikwal an mga pasaway na madaling magpa-land conversion kan dagang pang agricultura.

Kadakle kan daga sa agricultura kan ciudad yaon sa itaas na barangay na kulang na an saindang suplay sa gulayon envez an iba hale na sa ibang mga municipalidad.

Maheheling digdi an mga suplay nin gulayon sa mercado publico kadakle hale na sa ibang lugar asin kulang na an hale sa ciudad, sabi pa ni Lavadia.

An dating consejal iguang programang ‘‘Asenso Agricultura’’ sa OK FM radio cada aldaw nin Domingo na mayor na isyu pang agricultura sa barangay nganing matabangan an sektor nin paraoma asin consumedores.