SA DEVOLUTION SA 2022: 4th, 5th class municipalities dejado sa marerecibing IRA

Nagsikad na an mga pigcoconducir na Devolution Transition Planning (DTP) kan Department of Local Government (DILG) sa mga lokal na gobierno alagad sa pag-aadal kan 4th asin 5th class municipalities dejado sinda sa marerecibing alokasyon sa dugang na Internal Revenue Allotment na aapodon nang National Tax Allotment (NTA) asin ipapasunod na kan gobierno nasyonal nurong taon.

An mangyayari igwa man kutang dugang na alokasyon dai man magagamit kan LGU envez madalagan sana sa mga devolved agency siring kan Department of Social Welfare and Development (DSWD), Department of Agriculture, Department of Environment and Natural Resources (DENR), National Irrigation Administration asin iba pang mga ahencia nasyonal.

An seminar sa DTP pigtukahan kan DBM an DILG bilang pag-andam kan devolution transition sa 2022 mantang gigibohon nang 37.89 por ciento an marerecibing IRA kan mga LGUs base sa Mandanas-Garcia ruling.

Ini an mga pahayag ni Alcalde Ronaldo ‘‘Boy’’ Franco kan Pamplona, Camarines na sarong 4th class municipality an saindang banwaan na igwang Php140 annual IRA alagad sa percentage madadagdagan sinda nin Php30 milyon na fondo para sa operating expenses kan mga ahencia na made-devolved sa LGU.

An dugang na fondo para sa pansueldo sa mga empleados kan sinambit na ahencia asin iba pang operating expenses.

Pig-halimbawa ni Alcalde Franco kun ipapasa sa LGU an pension kan mga senior citizens magastos sinda nin Php11-milyon mantang sa iba pang ahencia iyo man an mangyayari para sa maintenance and operating expenses.

Pera nalang an matatada sa LGUs na 4th o 5th class municipalities asin an makakabentaje digdi an mga 2nd asin 1st class municipalities asin cities.

Si Presidente Rodrigo Duterte nagpaluwas nang Executive Order sa implementasyon sa pagbalyo sa mga proyekto sa infrastractura, agriculture, social welfare, health care asin livelihood.

An dugang na IRA sa mga LGUs bako lang hale sa koleksyon sa buwis kan Bureau of Internal Revenue envez ibabale na an mga koleksyon sa buwis sa nasyonal. (dpa)