SA DPWH 3RD ENGINEERING DISTRICT: DE Doloiras nagtugdas sadiring version kan community pantry

Canaman, Camarines Sur --- Sagcod na igwa pang bonga an mga tinanum na gulayon sa laog kan mga bakanteng lote magpapadagos an community pantry sa laog kan Camarines Sur 3rd Engineering District kan Department of Public Works and Highways (DPWH) sa banwaan na ini.


An manlaen-laen na gulayon yaon sa ginibong garden ni DE Romeo D. Doloiras na nagpuon siyang mag-gudak nin daga puon na madestino siya digdi kan Enero 2021 karibay ni DE Rebecca Roces na inapon sa provincia nin Masbate.


An mga tinanum na gulayon kinakabalihan kan ampalaya, balatong, petsay, talong, tapayas mantang igwa pang papakamangon na dugang na ampalaya.


Sinabi ni Assistant District Engr. Richard Emmanuel P. Ragragio na kun igwa nang mga bonga libreng magkua alagad an iba ginugulay ni DE Doloiras na tinataong libre an lutong gulay sa mga section office.


Bakong lang bilang district engineer an saiyang trabajo alagad pagbakante an oras paghapon nagbububo asin kun aldaw nin Sabado sige an saiyang gudak nin daga asin paghale kan mga nagtatarambong duot, sabi pa ni ADE.


Si Doloiras, tubong Sorsogon dati nang ginigibo an ‘‘gardening’’ kan madestino sa Masbate maging sa iba pang district engineering office kan provincia.


Siya iyo an responsable nganing magkaigwa nin mga sport activities an mga empleados. (DPAureus)

DE Romeo D. Doloiras kan Camarines Sur 3rd Engineering District kan DPWH nagbibisita sa saiyang tanuman nin mga gulayon sa laog kan bakanteng lote sa district office. (dpa)