SA ELECTRIC COOP: 70 anyos na direktor binabawal na kan NEA

An Multi Sectoral Electrification Advisory Council (MSEAC) iyo an mapili nin pangaran kan calificadong miembros-consumedores kan Camarines Sur I Electric Cooperative (Casureco I) nganing saindang i-nominate sa nabakanteng direktor.


Si General Manager Ann Sylvia Alsisto nagpahayag ini an saindang pig-iimplementar kun an sarong direktor discalificado nang magpa-dagos sa posisyon siring kan nagsakat na sa edad na 70 anyos asin nagcandidato sa pirilian lokal asin nanggana sa eleksyon.


Sa Gainza, Camarines Sur an MSEAC kan Gainza District nakapili na kan saindang nominado na sinda Dominic Magno asin Emilita Pante alagad saro lang sa sainda an pipilion.


Si dating direktor digdi na si Teresita Gontang, discalificado nang magpadagos sa puesto mantang over-aged na susog sa perang taon nang memorandum circular kan National Electrification Administration (NEA).


Sinabi ni Alsisto dawa sinda iyo an pig-nominate kan MSEAC alagad kaipuhan kumpletohon an gabos na dokumentos na pigmamanado kan (NEA) mantang an ahenciang ini iyo an maaprubar kan saindang nombramiento.


Kabale sa nagkaperang rekisitos iyo an minasunod, dapat miembro-consumedores kan saindang distrito na rerepresentarar; naka-atendir sa Annual General Membership Assembly (AGMA); dapat dai pa nag-eedad nin 70 anyos asin nagtapos sa apat na taon na academic course sa colegio.


Sa Camaligan District, si direktor Manoling Moll nasa pagbabakasyon sa puesto matapos magplantiar kan saiyang certifico de candidatura sa Comelec komo candidatong consejal sa banwaan nin Camaligan.


Kun manggana siya sa eleksyon considerado nang nagdemiter sa posisyon alagad kun madaog mabuelta sa saiyang distrito.


Sa Casureco II sa Ciudad nin Naga, si direktor Roberto Borja kan Bombon District discalificado nang magpadagos sa posisyon matapos maabot na kaini an edad an 70 anyos alagad mayo pang karibay. (dpa)