SA ELEKSYON SA 2022: Luigi, LRay mayong kalaban

Andaya tubod na may malaban sa mag-ama


Posibleng mayo nang candidato an oposisyon sa Camarines Sur nganing iyo an ilaban ki Luigi Villafuerte bilang candidatong gobernador sa eleksyon sa Mayo 9, 2022 alagad ultimo diya ngunian na Septiembre 30 an hinahalat ni dating Congresista Rolando Andaya Jr. nganing magparehistro sa Comelec, Magarao, CSur si Bise Presidente Leni Robredo para calificado magdalagan sa cargong gobernador.

Maging an saiyang ama na si 2nd District Congressman LRay Villafuerte mayo nang nagbubutwang pangaran hale sa oposisyon mantang dai na nagpapaheling si dating Congresista Dato Arroyo nganing magpasabot sa saiyang mga lider na mabalik sa laban sa politica.


Si Vokal Romulo Hernandez kan segundo distrito kan Camarines Sur asin saro sa mga lider sa politica kan mga Villafuerte nagtutubod na mayo nang kalaban sa eleksyon an mag-amang Villafuerte mantang sagcod sa sinusurat an baretang ini mayo pang naglalangtad nganing magpahayag kan saindang intensyon na mag-file nin COC sa Comelec.

Sa Oktubre 1 hasta Oktubre 8, 2021 iyo na an pagplantiar nin certifico de candidatura sa Comelec kan mga candidato nasyonal asin lokal.


Sinabi ni Dating Congresista Nonoy Andaya sa miembros kan media kasuodma na mapuli na sa Magarao an bise presidente alagad sagcod kasuodmang hapon mayong kumfirmasyan sa VP maging sa saiyang staff mantang mayong schedule na magpuli digdi sa Camarines Sur nganing magpa-rehistro sa Comelec Magarao.


Kun dagos nang dai magbutwa sa Camarines Sur ngunian na aldaw, Septiembre 30 si VP Robredo mayo nang imamanok an Anduyog Party contra ki Luigi na tugang kan magraduar nang Gobernador Migz Villafuerte na madalagan sa cargong congresista sa Rinconada district laban ki Alcalde Madel Alfelor kan Ciudad nin Iriga.


Nagluwas man an pangaran ni Bise Gobernador Imelda Papin na puedeng magdalagan sa cargong gobernador kasunod kan saiyang mga pahayag na duwang presidentiable an nag-iimbitaran sa saiya na magcandidatong gobernador alagad nagsayumang magkunfirmar kun saiyang lalabanan an tugang ni Gob Migz.


Nagkaperang mga alcalde asin politico an nag-aalok sa bise gobernador nganing panginotan an grupo kan oposisyon alagad dai pang pinal na desisyon asin sagcod sa ngunian siya pa an ka-tandem ni Luigi.


Dinagdag pa kan dating Majority Leader sa Camara-Baja na si dating 2nd district congressman Dato Arroyo mapuli sa Libmanan, Camarines Sur nganing labanan si Diputado LRay, alagad an saiyang mga lider dai aram kun mapuli an dating lehislador.


Si Andaya iyo an pig-endorsar na interim na candidatong gobernador kan Anduyog Party alagad nagsibog pabor ki VP Leni nganing liwat magdalagan bilang representante kan premir distrito kan Camarines Sur.


An tugang kan paluwason nang gobernador nakaka-bentaje na sa amay na pagcampanya mantang haros malibot na niya an maabot sa 1,036 na barangay kan 35 municipalidades asin sarong ciudad sa Camarines Sur. (DPA)