SA EMPLEADOS KAN GOBIERNO: Pwedeng mag-display nin campaign materials sa saindang harong-Comelec

An Commission on Election (Comelec) sa Ciudad nin Naga nagpaluwas nin pagklaro na dai sinda nagbabawal sa arin man na empleados nin gobierno na mag-bugtak nin campaign materials sa saindang residencia huli ta parte ini kan ‘‘freedom of expression’’.

Bako man ining pag-kampanya an mag-post sa harong nin arin man na empleados kan gobierno, ini an mga pahayag sa Bicol Mail ni Atty. Maico Julia Jr. Election Officer sa Ciudad nin Naga.

Prohibido sa sainda kan Civil Service Commission (CSC) iyo an magkampanya kan arin man na candidato lokal magin nasyonal sa maabot na midterm elections sa Mayo 12, 2025.

Kasunod kaini, an CSC enot nang nagpahayag kan saindang social media guidelines, na nagtutugot sa empleados kan gobierno na ‘‘mag-like, share, comment on, or repost election-related content’’. An pinagbabawal iyo an pagsuporta o pagcontra sa arin man na candidato o partido political sa panahon nin karampanyahan.

Sa Comelec Bicol, sinabi ni Regional Director Atty. Maria Juana Valez na prohibido sa mga job order asin contract of service employees kan LGUs na magkampanya sa arin man na incumbent officials na candidato alagad kun tapos na an saindang office hours alas 8:00 hasta alas 5:00 nin hapon puede nang magkampanya mantang pribado na sindang indibidwal asin mayo na sindang jurisdiksyon.

Igua nang mga osip na an ibang LGUs na nagnombra nin dugang na JOs alagad ginagamit sa karampanyahan mantang an appointing officers candidato sa eleksyon lokal. Alagad hagad kan Comelec na isombong asin magsangat nin reclamo nganing aksyonan.