SA EPEKTO KAN EL NIÑO: DepEd nagtutugot sa alternative learning

Tinutugotan kan Department of Education (DepEd) an mga escuelahan na ipasunod an alternative learning tanganing magpadagos kan klase kun apektado kan grabeng init huli kan El Niño phenomenon.

Dati nang nag-implementar kaini an mga escuelahan kan nagtalikod na taon nganing dai maapektaran an klase kan mga estudiantes dawa nasa harong sa paagi kan tolong aldaw sa escuelahan saka duwang aldaw sa harong puedeng gibohon.

Ini an mga pahayag ni Director Gilbert Sadsad mantang an modular modality asin online magdedepende sa lugar.

An Camarines Sur National Highschool sa Ciudad nin Naga saro sa ginibong solusyon iyo an shifting of classes mantang dakula an populasyon kan escuelahan.

Kan nakaaging taon huli kan labi-labing init kan panahon an ibang escuelahan nagpapa-klase sa sirong kan limpoy nin kahoy.

An Philippine Atmospheric and Geophysical Astronomical Services Administration (PAGASA) padagos na nagpapatanid kan epekto kan El Niño huli ta bako lang sektor nin paraoma envez an haros gabos kabali an harasahas sa mga escuelahan.

An El Niño iyo an pag-init kan temperatura sa tahaw asin sirangan na parte kan Dagat Pacifico kasunod kan pagluya nin duros hali sa sirangan o easterlies.

Mientras tanto, pig-andaman na kan DepEd Bicol an paluway-luway na pagbuelta kan dating school calendar kan dai pang pandemya sa paagi kan pagbalik sa April-May break, sa paghali kan ibang nawawalat kan ibang actividades sa school year 2023-2024.

Sa mga ginibong konsultasyon asin surveys sa manlaen-laen na organisasyon maging sa paratukdo, asin Parent Teachers Association nagpapabor kan pagbuelta sa Hunyo-Marso kan school calendar.

Sa DepEd Order No. 03, serye 2024 matatapos an school year 2023-2024 sa Mayo 31, 2024, mientras an EOSY Break nakatalaan magpoon sa Hunyo 1 hasta Hulyo 26, 2024.

Sinabi pa kan DepEd tinutugotan nin sarong bulan na bakasyon an mga paratukdo poon sa Hunyo 1 hasta 30, 2024 alagad dai kabali an none teaching personnel.