SA ESCUELAS PUBLICA: Enrollees naglangkaw, dai apektado kan pandemya

Naglangkaw an nagpalistang estudiantes sa mga escuelas publica kan Ciudad nin Naga ngunian na school year 2021-2022 na nagluluwas na dai man apektado kan pandemya mala ngani si enrollees nagsagad sa 106 porciento.


Alagad sa mga pribadong escuelahan iyo an apektado naghuros si nagpalista na pigtutubodan an causa iyo dakul nawaran nin trabajo huli kan duwang taon nang pandemya.


Pinahayag ni City School Division Superintendent Manny De Guzman kan Department of Education (DepEd), si dating labi sa 49 mil na enrollees kan nakaaging school year 2020-2021 alagad ngunian na erescuelahan nagsobra sa 52 mil an saindang estudiantes poon sa kindergarten, elementarya asin segundarya.


Kumpara sa kaparejong mga grado sa pribadong escuelahan hale sa dating labi sa 19 mil na enrollees alagad ngunian nagabot sana sa sobra sa 17 mil.


Nagtutubod an DepEd dawa distance learning nagtitiwala na sa sainda an magurang nganing sainda pa-escuelahon an mga estudiantes.


An ibang magurang na nakaulay kan Bicol Mail nagpahayag an saindang mga aki nagbalyo sa public schools mantang apektado an saindang pagbuhay matapos mawaran nin trabajo an saindang esposyo matapos magsara an companya kan saindang employer.


Si ibang mga tsuper nin jeepney maging tricycle na nagpapa-klase kan saindang estudiantes sa pribadong escuelahan napiritan na magpundo sa pagklase asin an iba nagbalyo sa escuelas publica. Agrangay an sektor nin transporte sa maluyang maghapon na kayod mientras na kulang pasajeros yaon naman an problema sa halangkaw na presyo sa produkto nin petrolyo.


An Ciudad nin Naga igwang 29 elementary schools asin 12 sa secondary schools na igwang total na 41 escuelahan.


An pig-aandaman kan DepEd iyo an face-to-face graduation sa Hulyo 2022 asin an sunod na burokasan nin klase posibleng gibohon na sa Septiembre 13 para sa school year 2022-2023.


An posibleng pagbuelta sa full face-to-face classes magdedefende sa ano man na direktiba kan opisina sentral kan ahencia. (dpa)