SA FLOOD CONTROL: Fondo itaong subsidiya sa system loss - Casureco II

Nagtutubod an Camarines Sur II Electric Cooperative (Casureco II) na kun ibabasura kan congreso an system loss (SL) kan mga electric cooperative (ECs) dapat halion na an bilyones pesos na fondo sa flood control envez itaong subsidiya sa SL.

Dai kayang pasanon kan Casureco II kun hahalion na sa mga power bills kan mga miembros-consumedores an saindang sinisingil na system loss, sabi ni Rinner Bucay opisyal na parataram kan cooperativa komo saindang reaksyon sa pahayag ni Presidente Ferdinand Marcos Jr., sa saiyang ika-limang Statement of the Nation Address (SONA) na dapat halion na an system loss na sinisingil kan ECs sa miembros consumedores. An isyu sa bilyones pesos na flood control padagos na tinutuyaw huli kan mga ghost project kan ibang mga politico.

Sa ngunian sinda House Speaker Faustino Dy III asin Majority Leader Sandro Marcos nagsangat na nin House Bill No. 10430 ‘’System Loss Charge Abolition Act’’ komo kasimbagan sa anuncio ni PBBM sa ika-limang SONA na dapat ibasura na an pigcocolectang system loss kan mga ECS.

Si Bise Alcalde Gabriel Bordado Jr., nagtapos kan saiyang siyam na taon na termino sa Camara-Baha bilang representante kan tercer distrito kan Camarines Sur asin dating Minority Leader, nagsabi an bill maagi pa sa pag-enmienda kan ley sa senado alagad maabala huli kan nagpapadagos na impeachment trial na posibleng matapos sa Deciembre 2026.

Sinabi pa Bucay na mandato sa sainda kan Energy Regulatory Board an pag-colecta ninda kan system loss o kan gabos na ECs sa nasyon.

Agrangay ngunian an ribo-ribo miembros consumedores kan Casureco II huli ta naglangkaw naman an tarifa na inaabot na sa P13.00/kWh alagad pinapasa pa sa saindang power bills an system loss.

Piglinaw kan cooperativa na an system loss charge sinisingil huli kan technical asin non-technical losses kabale na an hinahabon na kuryente o sa mga ilegal koneksyon.

Sakop kan Casureco II an Ciudad nin Naga, asin an mga banwaan kan Canaman, Magarao, Bombon, Calabanga, Milaor, Minalabac, Pili, Tinambac, asin Siruma.