SA FOOD SECURITY SA EPEKTO KAN EL NIÑO: NFA Bicol andam na sa dugang na stock nin paroy

Nilangkawan na an buying price kan National Food Authority (NFA) na saindang binabakal sa mga paraoma hale sa dating P27 envez ginibo nang P28 cada kilo bilang pag-andam sa ‘‘super’’ El Niño nganing madagdagan an saindang suplay sa mga bodega.

Alagad an opisina rehiyonal kan NFA sa paagi kan saindang Assistant Regional Manager Julia Llenaresas nagpahayag na paglangkaw kan presyo limitado sana sa mga provincia kan Camarines Sur, Camarines Norte asin Albay matapos aprubaran kan saindang opisina central. Sa mga provincia kan Catanduanes, Masbate asin Sorsogon si dati sanang presyo na P27.

Segun sa NFA an pag-andam nin dugang na suplay nganing maseguro an food security sa rehiyon huli kan epekto kan super El Niño.

Padagos na an aranihan nin paroy kan mga paraoma asin komo pagpaseguro nag-arkila nin dugang na mga bodega nganing maseguro na digdi na mag-stock nin dugang na mga paroy.

Kun panahon nin aranihan barato an presyo sa mga kumprada huli kaini dinagdagan pa an presyo sa sinambit na ahencia.

Sa report kan Department of Agriculture Bicol, dakul na an danyos sa sektor nin paraoma orog na sa omahan huli kan nag-gagaratak na an daga orog na si mayong patubig asin nag-aasa sana sa uran.

Bodega kan NFA mawot madugangang nin stock nin bagas komo pag-andam sa posibleng pagkulakulang nin NFA rice sa panahon kan El Niño.