SA GUBERNATORIAL POLLS: Villafuerte nagguno nin batikos, pag-omaw ki Rodriguez

Ni Paulo DS. Papa

NIN huli sa kawaran niya nin presensya sa piggibong Harampangan 2025 sa Ateneo de Naga University nakaguno si Camarines Sur 2nd District Congressman LRay Villafuerte nin pagtuya-tuya sa social media mantang si Gubernatorial Candidate Bong Rodriguez pag-umaw an pig-ani.

Matatandaan kan nakaaging Domingo, fetsa 27 kan Abril, pig-angat ni Rodriguez si Villafuerte na mag tunga sa political forum na piggibo sa nasambit na institusyon sa masunod na aldaw nin Lunes, Abril 28.

Sa sarong viral video sa social media na pigkua durante kan saiyang pag-angat kan Domingo pigsabi ni Rodriguez na kun may respeto si Villafuerte sa mga tawo maninigo na mag atubang ini sa political forum.

Susug pa sa video pigtawan-doon ni Rodriguez na takot an kalaban kaini o kun dae mayo nin respeto sa mga tao kun ini dae umatubang sa forum dahil sa tiripon ipepresentar kan ambos lados an saindang mga gigibuhon sa probinsya.

Pirang minutos antes na magpoon an forum pigheras ni Rev. Fr. Marc Real, pamayo kan Parish Pastoral Council for Responsible Voting (PPCRV) sa Bicol Mail na dae na makaka atendir pa si Villafuerte huli na man sa proclamation rally na piggibo kan kaparehong aldaw sa Barangay Sta. Salud, Calabanga, Camarines Sur kun haen pigpadara an bandang Chocolate Factory tanganing maglibang nin mga partisipantes.

Kadakol na mga netizens an nagkantyaw sa lehislador – naheling sa comment section sa live video kan Archdiocese of Caceres durante kan piggibong forum.

Sa banwaan kan San Fernado, Camarines Sur nagpaluwas nin post si Alkalde Fermin Mabulo na nagsabing “Dae ngani nagsipot sa boxing sa debate pa daw?!”

Kan Hulyo 6, 2023 pig-angat kan lehislador an alkalde nin boxing. Kan Hulyo 30 pig-ako ni Mabulo an angat ni Villafuerte. Setyembre 23 an pigtaong fetsa ni Mabulo sa kongresista kun haen piglaoman ngani an burugtian sa Jesse M. Robredo Colesium alagad da na nadagos.

Labi man an nagin pag-omaw ki Rodriguez sa paghampang kaini sa forum apesar kan kawaran nin kalaban.

Sa saiyang patara-tara pagkatapos kan forum pig-omaw ni Rodriguez an mga nag organisar kan forum alagad mas pig-omaw kaini an mga kandidatong nag atendir.

“Pero mas saludo ako sa mga kandidato na nag kusog-boot na mag-atubang para maglatag kan saindang pagkatao asin saindang plataporma de gobyerno para maintindihan kan mga ordinaryong tao.”

Apwera sa saiya, yaon sa forum an mga kandidato sa kargong kongresista na sinda Noel De Luna, Alkalde Nelson Legacion kan syudad nin Naga asin si dating konsehal kan syudad, Abogado Pito Tria.

Si Nonoy Magtuto amay nang nagpaisi sa PPCRV na dae ini makakahampang sa forum huli na man sa mga kasiributan politikal.