SA HARABONAN NIN WATER METER: MNWD, NCPO nagbilog na nin Composite Team
Nagbilog na nin Composite Team an Metropolitan Naga Water District (MNWD) asin Naga City Police Office (NCPO) nganing tutukan an imbestigasyon sa sunod-sunod na harabonan nin water meter kan mga konsisyonaryo.
Sa entrevista kan Bicol Mail ki Acting General Manager Florencio Mongoso Jr. sinabi kaini, masarong bulan na an CT alagad dai ninda hinahali na igwang kasabwat na empleados kan water district.
An insidenteng ini nangyayari bako lang sa MNWD maging sa iba pang water district sa Camarines Sur asin provincial.
Si Lt. Col. Errol Garchitorena, Deputy City Director for Operation kan NCPO iyo an Chairman kan CT mantang an Vice Chairman iyo si Roque Francisco, assistant General Manager kan MNWD na padagos na kan saindang ginigibong imbestigasyon alagad hagad ninda an cooperasyon kan mga biktima maging empleados kan water district nganing masangatan an envuelto sa harabonan nin metro kan tubig.
Apat nang veces nagkaigwa nin miting an CT na kabali sa mga pinaapod si plumber asin si yaon sa maintenance.
Antes naglaog si Mongoso bilang AGM kan MNWD kan Hulyo 1, 2022 igwa nang maabot sa sangatos na lista nin mga hinabon na metro kan tubig sa Ciudad nin Naga asin pagtaraid na banwaan na sakop kan serbisyo kan water district. Igwa nang total na 154 mga metro an nahabonan kan mga dai pa namimidbid na suspechado.
Kan Agosto 31, 2022 huli kan sobrado na an empleados na job orders kan MNWD igwang hinaling 73 na mga JOs.
Kan Septiembre 9, 2022, sa laog sana nin sarong aldaw maabot sa 60 mga metro an haros magkasurohay na hinarabon.
Sa inisyal na imbestigasyon kan CT, segun ki Garchitorena igwa nang naheling na suspechado na lunad sa motorsiklo asin an iba nakalunad sa tricycle na mayong body number.
Alagad sinabi pa kan NCPO na igwa nang persons of interest an saindang team.
An mga hinabonan dapat mag-report sa NCPO bako sa barangay hall, sabi pa kan pamayo kan CT.
Piglinaw ni Mongoso an manijamiento iyo an nagriribay kan bagong metro na igwang serial number alagad binabayadan nin utay-utay na pigkakaltas sa water bill. Ini nagcacantidad nin Php2,000 hasta Php2,400. dos mil pesos. (DPAureus)