SA IKA-128 ANIBERSARYO KAN PA: Unconventional warfare orgulyo kan suldados kan nasyon - 91D

Ni Paulo DS. Papa

ORGULYO kan 9th Infantry Division Philippine Army an unconventional warfare kun haen eksperto an militar kan nasyon.

Ini an nagin pahayag ni Army Major Franc Roldan an spokesman kan 9ID kan pagsigatuhon an pigselebrar na ika-128 anibersaryo kan Philippine Army na piggibo kan Sabado sa paagi kan mga aktibidad sa sarong bantugan na mall sa Barangay Triangulo, syudad nin Naga.

Segun ki Roldan, bakong arog kan mga soldados kan ibang nasyon na nakikilaban sa paagi kan conventional asin desert warfare an militar kan nasyon eksperto sa unconventional o guerilla tactics.

Ini huli na man sa pirang taon na pakikilaban sa mga insurhentes na may siring na taktika dara na man kan mabukid na terrain kan nasyon komo battlefield.

Apwera pa kaini, piggigibo man an social media operations asin iba pang aktibidad na may kinaaraman sa pakikilaban - bagay na nakakadugang pa sa combat experience kan mga kasuldaduhan kan nasyon sabi pa ni Roldan.

Pagluya kan fuerzang komunista sa rehiyon

Aktibong kooperasyon kan mga residentes sa far-flung areas sa militar an pigtutukdong dahilan kan 9th Infantry Division Philippine Army sa pagluya kan fuersang New People’s Army (NPA) sa Kabikolan.

Segun pa ki Roldan, ini huli sa information operations na saro man sa mga aktibidad kan militar kasumpay kan pakikilaban sa mga armadong komunista.

Sa nasambit na operasyon susug pa ki Roldan, pigpapasabot kan militar an peligro kan pakikikooperar sa mga komunistang grupo kaya nagin aktibo an mga sibilyan bilang partisipasyon sa pakikilaban sa rebeldeng grupo.

Huli digdi, for survival na sana an gibo kan mga personang padagos pa sa pagtumang sa gobyerno sa mga kabukidan.

AN camouflage uniform kan mga kasuldadusan kan 9th Infantry Division kan Philippine Army na nagpapaheling kan saindang kabatiran sa jungle o guerilla warfare susug na man sa terrain kan nasyon. (9ID PHOTO)