SA IKA-LIMANG SONA NI PBBM: KMB, disganado sa CARP program kan gobierno

Disganado an Kilusang Magbubukid ng Bicol (KMB), sa gobierno mala ngani sa ika-limang State of the Nation Address ni Presidente Ferdinanad Marcos Jr., huli ta sagcod sa ngunian mayo sindang naheheling na concretong solusyon sa problema sa krisis siring an kawaran nin tunay na reformang agrayo sa irarum kan Comprehensive Agrarian Reform Program.

Padagos na hinuhubaan nin deretso an tunay na paraoma sa daga mientras na prayoridad kan ahencia kan gobierno siring kan Department of Agrarian Reform na inaaprubaran tolos an land conversion para sa komersyalisasyon, pagsapribado kan mga mahiwas na daga na napapakinabangan sa agrikultural.

An sinambit na isyu nagdanay kan panahon pa kan dictador Ferdinand Marcos Sr. na ginigibong dahilan an pag-asenso kan sarong lugar nganing makontrolan an mahiwas na omahan para sa land conversion.

Inabuso kan gobierno an saindang poder na envez kan proteksyon sa paraoma ginigibong dahilan an pag-implementar sa infrastractura, turismo, pagmimina asin iba pang pang-industriyal na katuyohan alagad si deretso kan paraoma baliwala sana.

Afuera pa kaini, yaon pa an programang Build Better More, DOJ Opinion No.44,sa pigtutulod na mapalawig nin 99 anyos an foreign lease, sa katuyohan na ‘’investment friendly’’ an daga, mas lalong apektado an paraoma huli kan marikas an pagpagamit kan dagang agrikultura pasiring sa real estate, gamitong pang-negosyo na dai man naheheling an toltol na implementasyon pabor sa paraoma kan Comprehensive Agrarian Reform na haloy nang pigsasabing solusyon sa pagmonopolya kan kadagaan kan mga may kayang familia.

Mala ngani yaon pa an ibang politico na nag-aanab nin daga apesar na yaon sa laog kan programa kan CARP asin kadakle propriedad pa nin paraoma.

Protest rally vs SONA kan mga progresibong grupo sa Camarines Sur ginibo sa Ciudad nin Naga. (Retrato hali ki Manuelito Luna)