SA KAOGMA FESTIVAL: Bantogan na Miss Kaogma pig-aandaman na kan Capitolio

Saro sa mga pig-aabangan na dakulang actividad sa Kaogma Festival kan Camarines Sur sa Mayo 27, 2023 iyo an prestihiyosong ‘beauty pageants’ sa Filipinas na nakatalaan nang gibohon an preliminary screening sa Abril 16 asin 29, 2023 alas dos nin hapon sa Villa del Rey Function Hall, Cadlan Pili, Camarines Sur.

Nagpapadagos na an mga preparasyon kan Capitolio Provincial sa pamamayo ni Gobernador Luigi Villafuerte mantang inbitado an mga interesado na mag-ayon sa preliminary screening kan bantogan na beauty pageant sa nasyon.

Dakulang cantidad an pigtaya na mga premyo kan provincia sa mga manggagana mala ngani piglangkaw na sa P500,000 cash an makakapatos kan Miss Kaogma; an makakakua kan Miss Camarines Sur: P300,000 cash; sa Miss Tourism: P150,000 cash; sa makakakua kan 1st Runner Up: P100,000 cash asin sa 2nd Runner up: P75,000 cash.

Sa special awards sa makakakua kan Best in Long Gown: P25,000; sa Best in Swimsuit: P25,000; sa Miss Photogenic: P25,000 asin sa Miss Friendship: P25,000 cash.

Magiging magarbo an actividades kan provincia ngunian na taon matapos haros duwang taon naging simple sana si selebrasyon kan Kaogma huli sa pandemya.

An Kaogma Festival kan Camarines Sur ribo-ribo an nagbibisita lokal asin dayuhan na turista na dakulang tabang sa economia sa provincia maging sa ciudades kan Naga asin Iriga.

Dai paman nagpaluwas nin kumfirmasyon kun siisay an imbitadong mga artista asin iba pang mga personalidad nasyonal.

An Mayo 27, sa provincia declaradong fiesta opisyal. (dpa)