SA LAOG NIN 18 BULAN: 1K NPA nagsuko sa Phil Army

Nagluluya na an fuersa kan Communist Party of the Philippines/New People’s Army (CPP/NPA) sa Bicol kasunod kan padagos na pagsuko kan mga rebelde asin kan saindang suportadores mantang base sa datus kan 9th Infantry Division kan Philippine Army igwa nang total na 1,013 nagsukong rebeldeng NPA, kabale na digdi an Militiang Bayan (MB) asin Sangay ng Partido sa Lokalidad (SPL).

Si Army Major John Paul Belleza, jefe kan Public Affairs Office kan 9th ID na may base sa Camp Elias Angeles, Pili, Camarines Sur nagpahayag sa Bicol Mail, an sinambit na labi sa sarong ribong rebel returnees puon kan Enero hasta Deciembre 2021 base sa listahan igwang 155 mga regular na NPA; 512 kan MB asin 779 SPL mantang puon Enero hasta sa presenting bulan na Hunyo 2022 igwang 50 regular na NPA; 154 – MB asin 234 – SPL.

An CPP/NPA inapod na ngunian kan AFP bilang Communist Terrorist Group (CTG).

Alagad sa mga operasyon asin encuentro igwa nang ‘‘killed in action’’ na 29 NPA kan taon 2021 asin treceng NPA puon kan Enero hasta Hunyo ngunian na taon.

Sa pagtarabangan kan mga tawo asin komunidad dakulang bagay nganing maging positivo an operasyon kan militar laban sa teroristang grupo, sabi pa ni Belleza.

Kadakle kan mga nagsuko hale sa Masbate asin Sorsogon asin iba pang mga provincias kan Kabikolan, sabi pa.

Igwa naman 15 dating regular na miembro kan Communist terrorist Group sa Barangay Tastas, Ciudad nin Ligao, Albay an nagsuko sa 49th Infantry Battalion kan Hunyo 7, 2022.

An bagong mga nagsukong CTGs, isinuko man ninda an mga armas na kinababalehan sarong M-16 rifle; sarong homemade shotgun; sarong calibre 45; sarong calibre 38 revolver asin manlaen-laen na bala kan mga de-calibreng armas.

Sinabi ni Major General Alex Luna, Commander kan 9th Infantry (SPEAR) Division na an padagos na pagsuko kan miembros kan CPP/NPA nakakapagian nganing dagos-dagos nang matapos an problema sa insurhencia mantang nakakatabang pa digdi an programa kan gobierno sa paagi kan E-CLIP.

An pagtarabangan kan soldados asin kapupulisan, stakeholders, maging an kapamilya asin amigo kan dating miembro CTG, saro sa mga factor sa magayon na resulta kan programa kan gobierno na matawan bagong buhay an nagmamawot ‘‘magbalik loob’’ sa paagi kan Enhanced Comprehensive Local Integration Program (E-CLIP).

Sinabi pa ni Major Belleza na tinatabangan kan gobierno an dating CTGs, kasabay kan pagsuko kan mga armas sagcod na tinatawan sinda nin maninigong atensyon kan mga ahencias de gobierno. (dpa)

15 rebeldeng NPA dugang sa mga nagsuko sa 49th Infantry Battalion kan Philippne Army sa Albay. (9th ID)