Tolong art events tampok sa Samhod Festival 2025
- Bicolmail Web Admin
- May 2
- 2 min read
Ni Sonny Malate
Lagonoy, Camarines Sur --- Tolong gayong art events an kabale sa linyada kan mga actividades katakod kan ika-16 na celebrasyon kan Samhod Festival, Abril 26 hasta Mayo 2 digdi. ini piglalaoman na dagdag na contribuente sa advocacia kan local na gobyerno sa pagparambong kan cultura, turismo asin economia.
An Samhod Festival namundag durante sa termino ni dating Alkalde Delfin R. Pilapil, Jr. Ini nagtatampok kan samhod (soft broom) na gibo sa tinanom na sugbo. Ini reconosidong producto kan banwa sa irarom kan One Town, One Product (OTOP) kan Department of Trade and Industry (DTI).
Sa Abril 26 iyo an opening kan art exhibit kan Salingoy Art Group na may titulong “Ladawan”. Chair kan bantogan na art group iyo si Pancho M. Piano, international artist, pig-uurgolyong aki kan Lagonoy. Si Piano an parating nag-uuli sa Bicol kun may mga art events.
Saro man na mural competition na may temang “Istorya asin Kulturang Lagonoyon” an piglatag. Anom na mga grupo an nagparticipar digdi, kaiba na an mga miembros kan United Visual Artists in Partido (UVAP) sa pangenot ni Rodge Merabil. An UVAP an pinakaactivong visual art group sa Partido ngonian.
Ginibo pa an sarong on-the-spot painting competition sa may Kinahulugan Falls, barangay Kinahulugan digdi. An mapresko asin makawiliwiling lugar parating pigdadayo kan mga hubenes orug na ngonian na tag-init.
Manonotaran na an celebration kan Samhod Festival orug pang nagigin macolor huli ta laog digdi an celebrasyon kan pintakasi kan Parroquia ni Sts. Philip and James kada Abril 30 hasta Mayo 1.
An Samhod Festival 2025 iyo na an pinakahuring celebrasyon kaini sa siyam na taon sa puwesto ni Alkalde Delfin (JB) Pilapil III. An festival bistado sa Partido Area na minadurar nin sarong semana o labi pa. Midbid man ini sa paggibo nin serye nin celebrity nights na tinatampokan nin mga performers hale sa Manila.
Nakalinyadang mga performers na dinagsa kan katawohan sinda Tom Rodriguez, Geneva Cruz, Rochelle Pangilinan asin Kim Domingo. Dagdag pa an Cueshe, Streetboys asin UVM Dancers.
Segun ki Ariel O. Nitullano, Municipal Tourism Officer, an linyada kan mga bibong actividades iyo an pagpili kan Binibining Samhod Festival 2025, Poginoong Samhod 2025, fun ride, beer plaza, trade fair asin dakol pang mga dadalanon.
Dagdag pa man iyo an maconsuelong boxing, kite-making and flying competition, samhod making contest, Salampati racing asin laro ng lahi. Yaon pa man an Bidyu Turismo, zumba asin iba.
An Samhod Festival saro sana sa mga midbid na events sa Partido Area. An mga festival na ini bistado na, nagdadanay asin nagbubusol kan cultura, turismo asin economia kan localidad. Sa initiativa kan LGU asin suporta kan pampublico asin privadong sector ini padagos asin parte na kan buhay sa comunidad.
Sa presente, an Lagonoy sarong first class municipality. An oficina ni Alkalde Pilapil, sa supporta kan Sangguniang Bayan sa pangenot ni Bise Alkalde Jerry Jake R. Remoto,. sustenido an esfuerzos tanganing makasabay sa padagos na pagprogreso kan mga pagtaraid na localidad na Goa, Tigaon, Caramoan asin Tinambac.
Comments