SA LUPI, CAMARINES SUR: Residentes na-aalarma sa mga sunod-sunod na paglinog

Na-aalarma an mga residentes kan Lupi, Camarines Sur mantang haros cada semana ngunian na Agosto 2025 sunod-sunod an nangyayaring paglinog alagad sa mga inspeksyon na ginibo kan MDRRMO sa mga estraktura kabale na an mga tulay mayo man nin danyos.

Sa entrevista kan Bicol Mail ki Bise Alcalde Noel Agravante kan Lunes, Agosto 25, 2025 nagkaigua nin haros sampulong veces na pagyugo-yugo sa saindang banwaan.

Sa report sa sainda kan Philippine Institute of Volcanology and Seismology (PHIVOCVS-DOST) an insidente kan Lunes nagpoon alas 6:47 nin aga nasa 4.4 magnitude earthquake, iguang 1.8, 1.6, saka nagkapera pang veces na maluyang paglinog mala ngani igua man nin insidente sa Ragay, Camarines Sur sa kaparejong aldaw.

Nagpasalamat man an LGU ki Romulo Pasagui asin Vincent Seda kan PHIVOLCS sa oras na pinapaabot na impormasyon na saro sa mayor na dahilan iyo an ‘‘fault line’’ sa saindang banwaan. An sinambit na ahencia nagpadara nin sarong monitoring team sagcod nagkaigua nin miting sa comunidad.

Si Garry Cruz kan LDRRMO nagreport ki Alcalde Christopher Jacinto na regular an saindang mga pag-inspeksyon sa mga estraktura dawa na ngani kadakle maluya man an nangyayaring linog sa saindang lugar.