SA LUPI SUPER HEALTH CENTER: DOH Bicol dai pa napaluwas ninfondo nganing magin operational

Nagtapos an taon 2025 alagad dai maaraman kan lokal na gobierno kan Lupi, Camarines Sur kun nuarin matagama nin cantidad P50-M an Department of Health (DOH) nganing maging operational an phase 1 kan saindang pinatukdok na Super Health Center.

Kan dati pang administrasyon ni Alcalde Lilian Gagay Matamorosa pinatugdok an edificio alagad nagtapos an taon dai na pinadagos.

An Phase 1 kan edificio binasbasan kan Hunyo 30, 2025 sa dating administrasyon ni Alcalde Matamorosa na presente an opisyales kan ahencia asin opisyales kan LGU.

Dai magamit an edificio kan DOH mantang sagcod sa ngunian mayo pa ngani nin tubig asin kuryente.

Alagad napag-araman ki Bise Alcalde Noel Agravante na kaipuhan pa an dugang na P5-M nganing ipadagos an pagpatugdok kan Phase 2 sa edificio, dai man nangyayari mantang dai maaraman kan LGU kun nuarin maabot hale sa sinambit na ahencia.

Cantidad sanang P241-M an 2026 annual budget kan LGU asin mayong kakayahan nganing sinda an magtagama nin P50-M para sa operational kan Super Health Center.

Si Vocal Waren Señar kan premir distrito kan Camarines Sur enot nang nagtuyaw sa proyekto na nakatiwang-wang sana asin pinabayaan na kan DOH mantang dai man nagtagama nin fondo huli ta mayong kakayahan an LGU nganing sinda an magpaluwas nin fondo nganing maging operational.

Sinabi pa kan vocal na igua man kaparehong proyekto sa Ragay, Camarines Sur alagad sagcod sa ngunian nakatiwang-wang.