SA MAGARAO, CSUR: Nagabaan nin harong tinabangan kan MPS

Tinabangan kan Magarao Municipal Police Office (MPS), Magarao, Camarines Sur an sarong familia sa Barangay Karigsa, na enterong garaba si harong matapos kan bagyong Uwan kan saindang padarahan nin construction materials nganing makatindog giraray an saindang estaran.

An MPS Magarao na pinamamayohan ni P/Capt Mark Spana naglibot sa mga barangay matapos kan nakaaging calamidad alagad naheling ninda an sarong garabang harong sa Barangay Karigsa na tolos ninda hinanap an kagsadiri nganing matabangan.

Dai nakatios an jefe de pulisya tolos pinaabante an saindang mobile car nganing magbakal nin construction materials asin saindang personal na hinatod sa familia na nagabaan residencia.

Tolos man nagpasalamat an familia na dai na nginaranan na nabigla sinda sa mga awtoridad huli ta iyo an nahirak asin nagtabang sa saindang kamugtakan.

Premirong nangyari ini sa Magarao MPS na saindang tinabangan an nagabaan estaran.

Sinabi ni Spana na regular an saindang pagpatrolya sa mga barangay nganing maaraman an kamugtakan kan paz y orden asin makiulay sa mga residentes nganing maparani sa mga awtoridad.

Mientras tanto, orgulyo kan banwaan nin Magarao an saindang jefe de pulisya matapos makarecibe nin Award of Commendation hale sa Department of Interior and Local Government sa Municipal Anti-Drug Abuse Council.

An onra nagpapaheling kan saindang kampanya laban sa ilegal na droga na dakulang bagay sa comunidad nganing labanan an ilegal na actividad sa sinambit na banwaan.

MAGARAO MPS tinabangan an sarong familia sa Barangay Karigsa, nganing darahan nin construction materials an sarong familia na nagabaan nin harong matapos kan bagyong Uwan. (Magarao MPS)