SA MAKAKUA NIN SGLG AWARDS: Brgy. makakarecibe nin P500k na insentibo

Makakarecibe na nin insentibo an sarong barangay kan Ciudad nin Naga oras na makarecibe nin Seal of Good Local Governance (SGLG), sarong ‘‘prestigious award and recognition program’’ para sa mga LGUs asin Barangay hale sa Department Interior and Local Government (DILG).

Sarong ordinansa an inaprubaran sa huring 14th regular session kan Sangguniang Panlungsod kan Hunyo 24, 2025 na padreno si re-elected Councilor Ghiel G. Rosales na arin man na barangay kan ciudad na marecibe nin onra kan SGLG iguang premyo na cantidad Php500K hale sa City hall. An ordinansa ma-epekto ngunian na bagong administrasyon ni Alcalde Atty. Leni Robredo mantang tatagamahan nin fondo para sa 2026 annual budget.

Pinaboran kan gabos na miembros kan SP kabale an duwang ex-officio members hale sa Liga ng mga Barangay, Sangguniang Kabataan Federation asin City Youth Councilors.

Si Rosales na dating Barangay Kagawad sa Barangay San Felipe antes naging consejal kan ciudad nagsabi na maninigo an sinambit na insentibo nganing an mga barangay kan ciudad magpaheling kan saindang marhay na performance para sa mga residentes kan barangay.

Sa pagpili kan DILG kabale sa mga criteria iyo an minasunod: Financial Administration and Sustainability; Disaster Preparedness; Social Protection and Sensitivity; Health Compliance and Responsiveness; Environmental Management; Peace and Order; Tourism, Culture, and the Arts; asin Business-Friendliness and Competitiveness.