SA MASBATE: 9th ID, Comelec nangenotan sa peace covenant signing

Bako lang sa pagdugang nin tropa militar sa provincia na hot spot sa maabot na eleksyon sa Mayo 9 envez pinangenotan kan jefe kan 9th Infantry (SPEAR) Division kan Philippine Army an ‘‘Dialogue and Peace Covenant Signing and Presentation of Firearms’’.


An actividad ginibo kan Abril 29, onse diyas antes kan pirilian sa Mayo 9, 2022. An programa pinangenotan ni Major General Alex Luna, jefe kan 9th ID sa Bicol asin pig-inisyar kan Commission on Election (Comelec) na ginigbo sa Social Center sa Ciudad ninMasbate.


Presente sa actividad iyo an mga candidato lokal kan provincia nin Masbate na nagparticipar sa peace covenant signing asin pagsuko kan saindang mga armas.


Katuyohan kan Comelec para sa pagkakasararo, matuninong asin may integradad na eleksyon ngunian na taon. An mga participante nagpapangako kan saindang pagsunod sa elections laws, mga reglamento asin irespeto an ‘‘electoral exercise’’.


Piglalaoman kan Philippine Army asin Comelec na an saindang kasundoan para sa proteksyon kan namamanuan asin deretso sa pagboto.


Nagkaperang de calibreng armas an sinuko sa militar nganing prubaran an saindang pangako para sa matuninong na eleksyon.


Alagad dawa na ngani igwa nang peace covenant signing kan mga participanteng candidato, an pinagsarong fuersa kan Philippine National Police asin Philippine Army magiging higot an saindang seguridad ngunian na panahon nin eleksyon sa hot spot na provincia sa pirilian lokal asin nasyonal.


An 9th ID enot nang nagpadara nin tolong batalyon kan saindang mga soldados afuera kaini igwa pang dugang na elementos kan kapupulisan na iwawarak sa manlaen-laen na mga banwaan.