SA MASBATE: DA nagpaluwas nin price freeze sa mga produktong agricultura

Nagpaluwas na nin patanid si Regional Executive Director Rodel Tornilla kan Department of Agriculture sa Bicol na estrictong iimplementar an price freeze sa mga produktong agricultura sa Masbate kasunod kan declarasyon sa State of Calamity sa provincia.

An mga produkto sa price freeze segun sa pamayo kan DA kinababalihan kan bagas lokal man o imported, karning orig, manok, sugok, mantika, asukar, pulang sibulyas, bawang, asin mga serang turingan, yellow fin, tuna asin tilapia.

Si dating presyo iyo an dapat masunod base pinakahuring monitoring kan ahencia sa mga mercado kan Septiembre 25, 2025. Ini antes kan paglamasa kan bagyong Opong sa Masbate.

Si mga nagsisinutil maatubang nin caso sa pagbalga kan Acta Republica 7581 o mas midbid sa apod na Price Act, kabale sa pinapangalad iyo an pagtago kan produkto ngani sanang magpalangkaw presyo. An mga madadakop pwedeng pamultahon o bawian nin business permit.

An gobierno provincial sa pamamayo ni Goberndor Richard Kho nagpatanid naman sa mga negosyo na dai maging opurtunista sa tahaw kan nangyaring calamidad sa sainda.

An Sangguniang Panlalawigan nagpasar na nin resulosyon na nagdedeclara nin state of calamity sa Masbate na kabale na an saindang patanid na prohibido magpalangkaw kan presyo kan mga prime commodities mantang apektado na ngani an namamanuan matapos kan calamidad.