SA MASBATE: Liwat kontrolado kan familia Kho

Liwat pinatos kan familia Kho an kapangganahan sa resulta kan nagtapos na midterm elections sa provincia nin Masbate nganing sinda an magpadalagan kan Capitolio Provincial asin tolong distrito kan provincia.

Sa cargong goberndor ginana ni Abogado Richard Kho karibay kan saiyang ama na si Antonio Kho na iyo an bagong congresista sa premir distrito; Si Bise Gobernador Dra. Olga Kho iyo na an bagong congresista kan segundo distrito; asin si Wilton Kho re-elected na congresista kan tercer distrito.

Sinda anas nang pig-proclamar kan Provincial Board of Canvassers matapos kan resulta sa pirilian.

Iguang veinte (20) municipalidades asin sarong ciudad an Masbate na anas ginana kan joven na matukaw na gobernador na landslide an saiyang kapangganahan.

An dinastiya saro sa naging isyu kan saindang mga kalaban sa eleksyon alagad mayong nangyari mala ngani saro sa nakadagdag kan ganahon ni Ara Kho an puestong alcalde sa Masbate City.

Kan mga nakaaging decada kontrolado kan mga Espinosa an sinambit na provincia alagad an natatada na sana sa politica iyo si Kris Espinosa na na-elehir komo vocal kan segundo distrito.

Sa 1987 constitution, prohibido an political dynasty alagad dai man na-iimplementar huli ta mayong pinapandanay na ‘‘enabling law’’ an congreso.

Laen kan Masbate digdi sa Camarines Sur sa limang congressional distrito sinda Gobernador Luigi Villafuerte iyo an bagong matukaw na representante sa segundo distrito karibay kan saiyang ama na si LRay Villafuerte na mabalik bilang gobernador asin sa ika limang distrito si re-elected Representative Migz Villafuerte.