SA MEMO CIRCULAR KAN LTFRB: Mga bus sa Albay, CamNorte puede nang magviaje sa Mla

Nagpaluwas na nin memorandum circular an opisina central kan Land Transportation Franchising and Regulatory Board (LTFRB) para sana sa provincia kan Albay asin Camarines Norte nganing magpadagos na kan saindang inter-regional route o puede nang magbuelta sa normal na viaje haling Bicol asin Manila.

Si Roderick ‘’Nonoy’’ Reforsado, operation manager kan Bicol Central Station sa Ciudad nin Naga nagkumfirmar kaini sa Bicol Mail alagad nakua niya an inpormasyon sa paagi kan website kan LTFRB central office na posibleng ngunian na semana marecibe kan opisina rehiyonal kan LTFRB Bicol, an mamundo dai kabale an Naga asin Camarines Sur.

Alagad an sektor nin transporte sa Albay natuyawan an LTFRB kun kasuarin pigcoconsiderar na kan mga experto sa salud na nasa second wave na an paglangkaw kan caso sa coronavirus disease sa Metro Manila nagpaluwas man kan MC na piglalaoman na magiging estricto sa bagong mga policia an IATF.

Dai man sinabi sa MC kun tano ta dai pa kabale an Camarines Sur asin iba pang provincias sa Kabikolan.

Posibleng sa Marso 15 magsikad na an regular na viaje kan bus sa Albay asin Camarines Norte na nagbubukas na kan ruta pasiring sa Metro Manila, sabi pa ni Reforsado.

Namumundo an mga bus operator, tsuper, empleados maging an saindang mikaniko sa BCS asin sa iba pang provincia sa Bicol huli ta sarong taon na mayo pa sinda nin trabajo apektado na an pagbuhay kan saindang familia.

Nasuspende an saindang regular na viaje puon kan Marso 17, 2020 huli kan pandemya.

Sa ngunian an mga tinawan sana nin special permit na magkayod sa paagi kan inaapod na inter-provincial route iyo an Raymund bus company, Peñafrancia tours asin BLTB alagad sa laog sana kan rehiyon cinco an saindang viaje.

An mga bus operator nag-aapelo na sa LTFRB na tugotan na sinda mag-viaje mantang andam nag-aasegurar sinda na masunod sa ano man na pulicia sa health protocol.

Kun an ruta kan Albay asin Camarines Norte-Manila kabale sa memorandum circular kan LTFRB, tano ta dai kaayon an iba pang provincias sa Bicol, sabi pa kan bus operators.

Sinabi pa kan operation manager kan BCS kan bulan pa nin Deciembre 2020 naghahagad na an mga bus operators asin tsuper na tugotan na sinda magkayod sa new normal alagad sagcod sa ngunian mayo pang aksyon.

Ipinahayag pa ni Reforsado na naghahalat sana an saindang opisina kan ano man na direktiva hale sa IATF asin LTFRB mientras na andam na an saiyang manijamiento kan terminal sa pagbuelta sa operasyon kan mga bus company. (DPAureus)