SA MGA APLICANTE KAN NAT’L ID: PSA nagbugtak nin satellite registration sa limang distrito kan Camarines Sur

Nagbugtak na nin mga satellite registration an Philippine Statistics Authority (PSA) sa limang congressional district kan Camarines Sur alagad ginatos pa an mga aplicante an nagpipirila sa Registration Center sa Ciudad nin Naga nganing makakua nin national ID kan Philippine Identification System (PhilSys). Nabigla an ahencia huli ta kan taon 2023 hasta 2025 haros mayo nang mga aplicante sa ID alagad sa ngunian biglang nagdagmang.

An PSA Camarines Sur sa pamamayo ni Raul Aspe nagsabi na nangalas siya sa ngunian huli kan nagparadakul an nagpipirila para makakua nin national ID. Sa ngunian an mga satellite registration; sa premir distrito yaon sa Sipocot, sa s egundo distrito sa San Fernando, sa tercer distrito sa Calabanga, sa ika-apat na distrito o Partido area sa Goa, asin sa ika-limang distrito sa Ciudad nin Iriga.

Alagad saiyang napag-araman na an mga aplicante si mga miembros kan 4Ps mantang mandato na sa sainda kan DSWD na dapat magkua na nin national ID nganing makarecibe nin ano man na biyaya hale sa gobierno. Kabale pa sa mga nagpipila si mga miembros kan senior citizens na saro man sa rekisitos sa sainda kan ahencia nganing makarecibe nin social pension na cantidad P1,000 cada bulan.

Nakatalaan maghagad an PSA Camarines Sur nin dugang na personahes nganing maparikas an pagrecibe kan mga aplicante.An National ID saro sa nagagamit komo ‘’valid ID’’ sa mga transaksyon sa bangko maging sa iba pang mga ahencias de gobierno.