SA MILAOR, CAMARINES SUR MASSACRE: Badil kan suspechado dati nang ginamit kan militar

Nadiskubre sa inbestigasyon kan Municipal Police Station kan Milaor, Camarines Sur sa press conference na ginibo kan Lunes, Noviembre 8 na si M-16 riffle na ginamit sa Milaor massacre kan suspechadong si Arturo De Leon, iyo man si armas na ginamit kan tugang kaini na si Army Pfc Marlon Emmanuel De Leon na suspechado sa pambabadil ki Marlon De Leon kan Deciembre 26, 2020, pinsan kan mga biktima sa makangirat na krimen.

Ini an pigbuyagyag sa media ninda paluwason na Chief of Police, P/Capt. Rosalinda Moises na presente an maribay na OIC COP P/Capt. Ermilio Discocho, Milaor Mayor Anthony Reyes asin Lt. Col. Louie Dela Pena jefe kan Police Community Relation sa PPO Camarines Sur.

Sinabi ni Moises base sa resulta sa ballistic examination kan PNP Crime Laboratory si kapsola kan M-16 riffe na nakua sa lugar kan krimen kaparejo kan armas na ginamit ni Pfc De Leon.

Buot sabihon si M-16 riffle na ginamit sa krimen ni Pfc De Leon kan Deciembre 26, 2020 iyo man ginamit na armas sa Tarusanan Massacre kan Viernes, Noviembre 5, 2021, sabi pa.

Alagad aaramon kan MPS kun an envueltong armas government issued na ginamit kan magtugang na mga suspechadong De Leon.

Huli kaini, piglalaoman na kabale sa dapat ma-inbestigaran iyo si Pfc De Leon kun panong ginamit kan saiyang tugang si armas.

Nagpahayag man si OIC COP Dischoco dawa an resulta sa forensic examination parejong M-16 riffle an ginagamit sa krimen kan Deciembre 2020 asin kan Noviembre 5, 2021 alagad dai pa puedeng mag-‘‘conclude’’ sagcod na dai pa nababawi an armas na ginamit kan suspechado.

Sa lado kan Philippine Army sa Camarines Sur, sinabi man ni Major John Belleza, opisyal na parataram kan 9th Infantry Division na may base sa Camp Elias Angeles, Pili, Camarines Sur an saindang kabado na si Pfc De Leon yaon sa custodia kan saindang kampo asin si service firearms kaini, gabos pig-turn over sa saiyang commanding officer.

An biktima ni Pfc De Leon, bodyguard ni Alcalde Reyes kan Milaor alagad nag-aatubang naman siya nin casong murder asin yaon sana sa custodia kan 9th ID kan Philippine Army sa Pili, Camarines Sur.

Dai man pinaliwanag kan PNP Provincial Office kun an biglaan na pag-relieved ki COP Moises huli kan nangyaring makangirat na krimen asin sa kapabayaan sa kampanya sa lose firearms, alagad si spokesperson Lt. Col. Louie dela Peña nagsabi normal sa saindang organisasyon na ano man na oras puedeng ribayan sa puesto asin idestino sa ibang lugar.

SA BICOL PNP

Kasunod kan nangyaring krimen tolos man nagpaluwas nin direktiva an Camp BGen Simeon Ola sa Ciudad nin Legazpi sa PNP Provincial Office (PPO) Camarines Sur na maglansar nin manhunt operation sa responsable sa massacre kan Noviembre 5 sa Milaor, Camarines Sur sa anom na magka-familia asin lima an binawian nin buhay asin kritikal sa hospital an saro pang biktima.

Si BGen. Jonel Estomo, regional director kan Bicol PNP nagpahayag na narecibe ninda an orden ni PNP Chief Director Gen. Guillermo Eleazar na tolos naglansar sinda nin mahiwas na operasyon bako lang sa Camarines Sur asin Kabikolan matapos marecibe ninda an report kan Milaor Municipal Police Station sa nangyaring makangirat na krimin.

SA REPORT KAN PNP MILAOR

Sinabi ni Chief of Police P/Capt. Moises an insidente nangyari sa brgy. Tarusanan, Milaor mga alas 5:30 nin hapon kan losubon kan suspechado an mga biktima na pinauranan nin bala kan M-16 dai pa nakuntento nagbalyo pang harong sagcod nagpara-pambadil.

An mga biktima base sa report kan Milaor MPS pigbisto an mga binawian buhay na sinda, Romeo De Leon y Perez, 72 anyos; Samuel Cobilla Jr. y De Leon, 21 anyos; Noela Agliones y De Leon, 7 anyos; Hobbie John Britanico y De Leon 6 anyos; asin Robbie John Britanico y De Leon, 4 anyos.

Mantang nakasalbar alagad nagpapa-bulong pa sa hospital si Hades John Britanico y De Leon, 7 anyos.

Sa inbestigasyon kan MPS an suspechado nagbalyo pang harong na naka-estar digdi si Luzviminda Cobilla, ina ni Samuel alagad siya an nagsalo kan mga bala sa paagi kan saiyang hawak na digdi man nagtapos an saiyang buhay. Antes nagdulag nagpasabog pa nin granada sa kusina kan biktima asin nakadamay si Noela.

Sinda Romeo asin Samuel, pig-declarang dead on arrival mantang pigdadalagan sa hospital mantang sinda Robbie, Hobbie asin Noela binawian nin buhay mientras na pigbubulong sa hospital.

Sa inbestigasyon kan MPS iriwal right of way sa daga an motivo sa krimen asin ini kinumfirmar man ni Tarusanan Punong Brgy. Brando De Leon.

An suspechado sa makangirat na krimen segun sa apat na ‘‘eye witness’’, sinabi pa ni COP Moises pigmidbid na si Arturo De Leon y Nullan nag-eestar sa Concepcion Pequeña, Ciudad nin Naga na segun sa pinakahuring report nag-aatubang nin homicide case sa Gumaca Regional Trial Court sa provincia nin Quezon.

Sinabi pa kan jefe kan Bicol PNP na nagpapadagos pa sa manhunt operation an kapupulisan sa Camarines Sur asin Bicol. (dpa)