SA MINALABAC, CSUR: Water district masurop tubig sa Bicol river
Nagtagama nin P32-M an lokal na gobierno kan Minalabac, Camarines Sur tanganing itustos na fondo para sa water treatment facility na masurop nin tubig sa Bicol river para sa malinig na suplay na tubig kan mga residentes.
An proyekto dai tolos na iimplementar kan Water District kan Minalabac sa tahaw kan pagparalangkaw kan presyo sa facilidad huli kan krisis sa produkto nin petrolio alagad sa dai mahahaloy pig-aandam nang iimplementar.
Si Alcalde James Lizardo, nagsabi na ini an solusyon kan LGU sa inaatubang sa pagkulang kulang nin suplay nin tubig kan mga residentes.
An proyekto igua naman sa ibang ciudad o provincia na natawan solusyon si kakulangan suplay nin tubig.
Igua sindang tolong pumping station alagad si saro dai na magamit huli ta mayo nang nakukuang tubig sa irarum kan daga. An solusyon iyo water treatment facility na nasurop nin tubig sa salog, sabi pa kan jefe ejecutivo.
An pumping station barato nin dikit alagad pakatapos nin tolo hasta limang taon pwedeng magka-problema naman sa suplay nin tubig. Kumpara sa salog dai mahahalian nin tubig kaya nganin ini an naisipan kan LGU bilang solusyon sa mga reclamo sa pagkulang kulang tubig sa saindang banwaan, sabi pa ni Lizardo.
Sa Ciudad nin Naga, enot nang pighasi kan Metropolitan Naga Water District an water treatment facility alagad kinanselar mantang pwede man sanang magpatugdok nin mga pumping station. Sa ngunian an MNWD igua nang 30 pumping station laen pa kan nakukua sa burabod nin tubig hale sa Mt. Isarog.
Comments