SA MNSC: Kondisyones sa pagpaarkila papandayon na kan Consejo

Posibleng mahaman na kan Sangguniang Panlungsod kan Ciudad nin Naga antes matapos an taon 2024 an pagpanday kan mga term and conditions sa pagpaarkila sa sarong pribadong kolehiyo kan Metro Naga Sports Complex (MNSC).

Pigtatawan ngona nin prayoridad kan City Hall an clearing operation kan mga tambak na basura sa centro kan ciudad asin sa iba pang barangay na winalat ni bagyong ‘’Kristine’’.

Ini an mga pahayag ni Consejal Salvador Del Castillo, pamayo kan Committee on Property na pendiente pa sa saiyang komite sa tahaw kan mga kahapoton kun ‘’awarded’’ na an pagpaarkila kan MNSC.

An Naga College Foundation (NCF) iyo an solong postador kan gibohon an bidding alagad kaipuhan magpanday ngona nin mga kondisyones antes magdesisyon an ciudad nganing pugolan na kan pribadong kolehiyo an pag-manihar kan sports complex.

Base sa ordinansa dawa pribado o arkilado an MNSC alagad an lokal na gobierno libreng maggamit para sa actividades lokal asin mga palaro.

An desisyon kan City Hall na paarkilahan an sports complex base sa ordinansa numerado 2023-096 na padreno si Consejal Del Castillo asin suportado kan mga miembros kan consejo.

Sa seccion 4, Papaarkilahan nin bulanan na cantidad Php100,000 asin dapat advance nin sarong bulan sa cada ika-limang aldaw kan bulan mantang an ‘’duration lease’’ sundo sa 15 taon, renewable sa maximum sa kapareyong peryodo o 15 taon, asin sa cada ika-limang taon magkakaigua liwat nin pag-aadal sa kontrata.

Nasa diez hektarya an hiwas kan lote kan MNSC na kabale sa arkilado iyo an grandstand, dormitories, offices, comfort room, dressing room, football field, track oval, tennis courts, and gallery, swimming pool and gallery and kiosks, baseball/football field, parking area alagad dai kabale an atubangan na porsyon kan sports complex hale sa gate asin atubangan na kudal pasiring sa grandstand saka Naga City Children’s Home.

An MNSC nakumpleto kan 1997 sa administrasyon ni dipunto asin dating DILG Secretary Jesse M. Robredo.