SA MNWD: Binakal na mga lote ipabakal, dugang tarifa sa tubig ibasura
Kun nakatiwang-wang sana an binakal na milyones peso na lote dapat an solusyon contra sa propuestong ‘‘water rate increase’’ ipabakal an cantidad na Php28-M na lote sa Sitio Pagdahicon, Brgy Mabolo asin Php50-M na lote sa Brgy. Balatas sa Ciudad nin Naga.
Ini an mga pahayag ni Consejal Vidal Castillo sa Bicol Mail sa rekomendasyon ni dating Board Chairman Emeterio ‘‘Boy’’ Aman kan Metropolitan Naga Water District (MNWD) asin kinumfirmar man ini kan director kan sinda maging bisita sa sesyon regular kan Sangguniang Panlungsod kan Lunes, Hunyo 20.
Sinabi pa ni Aman kun dai puedeng ipabakal mas marhay pang isangra sa bangko an dai nagagamit na mga lote kan water district mantang mayo ngani nin fondo sa planong proyecto sa duwang lote.
An pontong ini kan dating board chairman sa tahaw kan tolo nang taon nalulugi an operasyon kan MNWD envez na pasanon kan labi sa 50 mil na konsumedores an halangkaw na tarifa sa tubig.
Si Board Chairman Gilbert Albero nagpahayag na saindang naheheling na solusyon sa inaatubang na pagkalugi iyo an dugang na singil sa tarifa sa tubig alagad kaipuhan magagi sa konsultasyon sa publico.
Pigpaliwanag pa sa SP na kabale sa causa kan inaatubang na kalugihan iyo an over staff asin non-revenue water.
Sagcod kan Enero 31, 2022 an MNWD igwang total na 652 na empleados na kinababalehan kan 173 na permanente, 179 casual personnel asin sobra sa 300 na contract of service workers (CSWs).
An isyu sa pagkalugi kan water district nagluwas puon kan manijamiento ni dating GM Engr. Virgilio Launsing na pig ‘‘terminate’’ na kan junta directiva kan MNWD kan Marso 2022.
Si Launsing hinale huli kan kaluyahan o ‘‘mismanagement’’ sa pagpadalagan kan MNWD mantang kan panahon niya poon kan 2019, 2020 asin 2021 nalulugi na an water district.
PALIWANAG NI DATING GM LUANSING
Sa isyu kan binakal na Php78 milyon na lote sa Brgy. Mabulo asin Balatas saiyang sinabi na dai sinda mabakal kan envueltong lote kun dai aprubado sa board asin sa finance department.
An lote sa Brgy. Mabulo para sa propuestong konstruksyon kan Bicol River Surface Water Treatment Facility alagad kinontra kan junta mantang an sarong hektaryang lote sa Brgy. Balatas gagamiton para sa konstruksyon sa extension office kan water district.
Sa reclamo na sobrado an personajes kan MNWD, saiya sanang pigmana an isyung ini kan mag-asumir siya sa posisyon bilang GM.
Enot nang pinaliwanag kan dating GM na an isyu sa ‘‘financial losses’’ huli kan hababang tarifa sa tubig na sinisingil kan manijamiento kan water district.
Sa presente an saindang tarifa base pa kan taon 2009 mantang sa presenting tarifa dai na kakayahon an gastos sa operational expenses kan manijamiento huli kan halangkaw na tarifa sa kuryente nganing magpadagos an operasyon kan 27 pumping station.
Dapat cada ika limang taon poon kan 2009 nagpoon nang maimplementar an dugang na tarifa alagad kan 2014 mayong nangyari durante sa saiyang termino. Nag-apply sinda kan 2018 asin naaprubaran kan 2019. Apektado kan Covid-19 pandemic na dagos nang dai naimplementar. (Danny P. Aureus)