SA MNWD: Dawa co-terminus kan BOD, ok lang ki Mongoso

Dawa co-terminus sa board of directors (BOD) an posisyon kan general manager asin mas hababang marerecibing sueldo sa Metropolitan Naga Water District (MNWD) kumpara sa City Hall na halangkaw asin permanente pa bilang jefe kan sarong departamento alagad sa ngaran na serbisyo publico aakoon niya an kahagadan kan BOD na maging full-pledged GM kan water district.

Ini an mga pahayag sa Bicol Mail ni OIC General Manager Florencio Mongoso Jr. matapos magkaulay na sinda ni Alcalde Nelson Legacion kan Lunes na hapon, Noviembre 5 na tugot na siya sa kahagadan kan BOD na magbalyo na sa MNWD nganing dagos nang nombrahan bilang permanenteng GM.

Verbal pa sana an bendisyon kan alcalde asin hahalaton ninda an formal na surat sa BOD, sabi pa kan OIC GM.

Kan Oktubre 25, 2023 an BOD sa pamamayo ni Chairman Gilbert Albuero nagpasar nin resolusyon na hinahagad na ki Legacion na tugotan na si Mongoso na maghobo na sa water district nganing dagos-dagos nang makabangon sa dating pagkabangkaruti mantang sa laog nin sarong taon niya sa water district igwa nang mga ginibong reforma mala ngani nakabangon na an manijamiento.

Huli kan mga controverica sa manijamiento kan MNWD, si Mongso pinasuble sana kan City Hall para sa laog nin anom na bulan sagcod na pinalawig nin tolong bulan asin liwat naman pinalawig nin tolong bulan asin sa ngunian hagad na kan BOD na gibohon nang full-pledged sa posisyon.

Sa sueldo sa City Hall bilang pamayo kan Public Employment Service Office (PESO) nagrerecibe siya nin P145,000 asin igwa pang bonus na 65 por ciento kan saiyang sueldo na marerecibe sa productivity incentive bonus alagad sa MNWD cantidad sanang P125,000 na mayong insentibo kun nalulugi an manijamiento.

Afuera pa kaini, sa security of tenure kun mabiktima siya nin pamomolitica ano man na oras puedeng mahali bilang GM alagad kun mangyari ini paciencia na sana, sabi pa.

Dinagdag pa ni Mongoso an saiyang ka co-terminus iyo sinda directors Engr. Leon Palmiano IV asin dating Juez Sorina Rosa Co na matapos kan saindang termino sa 2028.

Kan taon 2022 kan magtukaw bilang OIC GM nalulugi an manijamiento nin P11 milyones alagad sa pinakahuring financial report nakabangon na an water district mala ngani ganansiya na nin P16 milyones.

Sa ngunian an saiyang pigtatawan prayoridad iyo an pagpaconstruhir asin pagribay nin bagong makina kan mga pumping station nganing resolberan an isyu sa pagkulang- kulang suplay nin tubig sa ibang mga barangay. (DPA)