top of page

SA MNWD: P34-M na net income bakong dahilan na daina kaipuhan an dugang na tarifa sa tubig

Dawa iguang P34-M na net income kan Noviembre 2024 an Metropolitan Naga Water District (MNWD) alagad naglalaom an manijamiento na aaprubaran man giraray kan Local Water Utilities Administration (LWUA) an duwang taon na nindang pendienteng petisyon sa dugang na tarifa sa tubig.


An MNWD nakatalaan magpatugdok ngunian na taon nin tolong pumping station na cantidad nin Php10-M cada saro na kaipuhan digdi an total na Php30-M.


Ini an mga pahayag ni Jesus Salvador Dela Cruz, opisyal na paratatam kan water district kan makuanan nin entrevista kan Bicol Mail sa tahaw kan saindang pig-oorgulyong milyones pesos na net income mantang saro sa mayor na dahilan kaini iyo an pagtipid sa gastos sa operasyon kan manijamiento.


Antes mag-asumir si General Manager Florencio Mongoso Jr, labi nang duwang taon an nakakaagi milyones pesos si lugi sa manijamiento asin sa ngunian nakakabangon na hale sa pagkalugi.


Laen pa kaini, an Php34-M na net income puede pang magbaba kan bulan nin Deciembre 2024 alagad hinahalat pa an final report kan accounting department huli ta igua sindang mga bayaran sa mga suppliers, electric bill kan Casureco II asin iba pang obligasyon.


Huli kaini, segun sa MNWD maninigo nang maaprubaran kan LWUA an saindang pendienteng petisyon sa water rate increase.


Kan taon pang 2009 dai nag-iimplementar nin dugang na tarifa an manijamiento na maabot na sa 16 na taon ngunian na 2025. Alagad kun susunodon sa LWUA policy an sarong water district puedeng magpalangkaw tarifa sa tubig cada ika-limang taon na dai nangyayari sa MNWD, sabi pa ni Dela Cruz.


Nag-aabot sa P12.50 cada metro cubico an saindang singil sa minimum na sampolong metro cubico alagad kun sobra na digdi igua nang dugang na singil.

Comments


bottom of page